#INDvsSA | முதல் டி20 போட்டி - தென் ஆப்பிரிக்காவை வீழ்த்தி இந்திய அணி அபார வெற்றி!

தென் ஆப்பிரிக்காவுக்கு எதிரான டி20 தொடரின் முதல் போட்டியில் 61 ரன்கள் வித்தியாசத்தில் இந்திய அணி அபார வெற்றி பெற்றது.

தென் ஆப்பிரிக்காவில் சுற்றுப்பயணம் மேற்கொண்டுள்ள சூர்யகுமார் யாதவ் தலைமையிலான இந்திய கிரிக்கெட் அணி 4 போட்டிகள் கொண்ட டி20 தொடரில் விளையாடி வருகிறது. அதன்படி இவ்விரு அணிகளுக்கு இடையிலான முதலாவது டி20 ஆட்டம் டர்பனில் நேற்று (நவ.8) நடைபெற்றது. இதில் டாஸ் வென்ற தென் ஆப்பிரிக்க அணி பந்துவீச்சை தேர்வு செய்தது. முதலில் பேட்டிங் செய்த இந்திய அணி 20 ஓவர்களில் 8 விக்கெட்டுகள் இழப்பிற்கு 202 ரன்கள் குவித்தது. இந்திய அணி தரப்பில் அதிகபட்சமாக சாம்சன் 107 ரன்கள் குவித்தார்.

தென் ஆப்பிரிக்க தரப்பில் ஜெரால்ட் கோட்சி 3 விக்கெட்டுகள் கைப்பற்றினார். இதனையடுத்து 203 ரன்கள் அடித்தால் வெற்றி என்ற இலக்குடன் ஆப்பிரிக்க அணி களமிறங்கியது. இந்திய அணியின் பந்துவீச்சை சமாளிக்க முடியாமல் தென் ஆப்பிரக்க அணி அடுத்தடுத்து விக்கெட்டுகளை இழந்தது. முடிவில் 17.5 ஓவர்களில் 141 ரன்களுக்கு தென் ஆப்பிரிக்க அணி ஆல் அவுட் ஆனது.

இதன் மூலம் 61 ரன்கள் வித்தியாசத்தில் தென் ஆப்பிரிக்காவை வீழ்த்தி இந்திய அணி வெற்றி பெற்றதுடன், தொடரில் 1-0 என முன்னிலை வகிக்கிறது.தென் ஆப்பிரிக்க அணி தரப்பில் அதிகபட்சமாக கிளாசன் 25 ரன்னும், கோட்சி 23 ரன்னும், ரிக்கல்டன் 21 ரன்னும் எடுத்தனர். இந்தியா தரப்பில் வருண் சக்ரவர்த்தி மற்றும் ரவி பிஷ்னோய் தலா 3 விக்கெட்டுகள் வீழ்த்தினர். ஆட்ட நாயகன் விருது சஞ்சு சாம்சனுக்கு அளிக்கப்பட்டது.