“இந்தியாவிற்கு ஆக்கிரமிப்பு எண்ணம் இல்லை” - கயானா நாடாளுமன்றத்தில் சீனாவை மறைமுகமாக சாடிய பிரதமர் மோடி!

“இந்தியா ஒருபோதும் விரிவாக்க உணர்வோடு முன்னேறவில்லை. வளங்களைக் கைப்பற்றுவது, வளங்களைப் பிடுங்குவது போன்ற மனப்பான்மையிலிருந்து இந்தியா எப்போதும் விலகியே இருக்கிறது” என பிரதமர் மோடி கயானா நாடாளுமன்றத்தில் உரையாற்றினார்.

பிரதமர் மோடி நைஜீரியா, பிரேசில் மற்றும் கயானா ஆகிய நாடுகளுக்கு ஐந்து நாட்கள் சுற்றுப்பயணம் மேற்கொண்டுள்ளார். முதலில் நைஜீரியாவிற்கு சென்ற பிரதமர் மோடிக்கு அந்நாட்டின் உயரிய விருதான் “Gcon” (‘The Grand Commander of the Order of the Niger’) விருது வழங்கப்பட்டது. இதன்மூலம் ராணி எலிசபெத்துக்கு அடுத்தபடியாக இந்த விருதை பெறும் இரண்டாவது வெளிநாட்டு தலைவர் என்ற பெருமையை பிரதமர் நரேந்திர மோடி பெற்றார். இந்த விருது கடந்த 1969 ஆம் ஆண்டு பிரிட்டன் ராணி இரண்டாம் எலிசபெத்துக்கு அளிக்கப்பட்டது.

இதனையடுத்து பிரேசில் சென்று “G20” மாநாட்டில் பங்கேற்றார். அதன்பின்னர் கயானாவிற்கு சென்ற பிரதமர் மோடி நேற்று அந்நாட்டு நாடாளுமன்றத்தில் உரையாற்றினார்.

கயானா நாடாளுமன்றத்தில் பிரதமர் மோடி பேசும் போது,

“நேற்று, கயானா எனக்கு அதன் உயரிய மரியாதையை வழங்கியது. இந்த கவுரவத்திற்காக அனைத்து கயானிய மக்களுக்கும் நான் நன்றி தெரிவித்துக் கொள்கிறேன். அதை இந்திய குடிமக்கள் அனைவருக்கும் அர்ப்பணித்துக் கொள்கிறேன்.

சுமார் 180 ஆண்டுகளுக்கு முன்பு, ஒரு இந்தியர் கயானாவிற்கு வந்தார். அன்றிலிருந்து, நல்லது-கெட்டது, எல்லா சூழ்நிலைகளிலும் இந்தியா-கயானா உறவுகள் உள்ளன. 14 ஆண்டுகளுக்கு முன்பு, நான் இந்த அழகான நாட்டிற்கு மிகுந்த ஆர்வம் கொண்ட நபராக வந்தேன். பொதுவாக, மக்கள் திகைப்பூட்டும் இடங்களுக்கு பயணம் செய்ய விரும்புகிறார்கள். ஆனால் கயானாவின் வரலாறு மற்றும் கலாச்சாரத்தை அறிய நான் இங்கு வந்தேன்.

இந்தியாவும், கயானாவும் சுதந்திரம் அடைந்தபோது வெவ்வேறு சவால்கள் இருந்தன. இன்று 21 ஆம் நூற்றாண்டில், உலகம் பல்வேறு சவால்களை எதிர்கொள்கிறது. கொரோனாவுக்குப் பிறகு, நாம் அனைவரும் ஒரு புதிய உலகை நோக்கி செல்ல வேண்டியிருந்தது. இருப்பினும், உலகம் மற்ற பிரச்சினைகளில் சிக்கிக்கொண்டது.

முதலில் ஜனநாயகம், மனிதநேயம் என்ற உணர்வைப் பின்பற்றி, இன்று இந்தியா ஒரு விஸ்வ பந்துவாக உலகிற்கு தனது கடமைகளை நிறைவேற்றி வருகிறது. உலகளாவிய ரீதியில் ஒரு பிரச்சனை எழும் போதெல்லாம், இந்தியாவே முதல் பதிலளிப்பவராக அடியெடுத்து வைக்கிறது. கொரோனா குழப்பத்தின் போது, ஒவ்வொரு நாடும் தன்னைத்தானே காப்பாற்றிக் கொள்ள முயன்றன. அந்த நேரத்தில், இந்தியா 150-க்கும் மேற்பட்ட நாடுகளுடன் மருந்துகள் மற்றும் தடுப்பூசிகளைப் பகிர்ந்து கொண்டது.

நாங்கள் ஒருபோதும் விரிவாக்க உணர்வோடு முன்னேறவில்லை. வளங்களைக் கைப்பற்றுவது, வளங்களைப் பிடுங்குவது போன்ற மனப்பான்மையிலிருந்து நாம் எப்போதும் விலகியே இருக்கிறோம். இன்று இந்தியா எல்லா வகையிலும் உலக வளர்ச்சிக்கு ஆதரவாக நிற்கிறது. அமைதிக்கு ஆதரவாக நிற்கிறது. இந்த உணர்வுடன், இன்று இந்தியாவும் உலகளாவிய தெற்கின் குரலாக மாறியுள்ளது.

இது உலகில் மோதல்களுக்கான நேரம் அல்ல. மோதலை உருவாக்கும் சூழ்நிலைகளை கண்டறிந்து அவற்றை அகற்றுவதற்கான நேரம். இன்று பயங்கரவாதம், போதைப்பொருள், சைபர் கிரைம் என எத்தனையோ சவால்கள் உள்ளன. அவற்றை எதிர்த்துப் போராடுவதன் மூலம் மட்டுமே நம் வருங்கால சந்ததியினரின் எதிர்காலத்தை வடிவமைக்க முடியும்” என்று தெரிவித்தார்.