IND vs AUS | அடுத்தடுத்த போட்டிகளில் பும்ரா நிகழ்த்தப் போகும் 2 சாதனைகள்!

இந்தியா - ஆஸி. இடையேயான பார்டர் கவாஸ்கர் போட்டி நடைபெற்று வரும் நிலையில் அடுத்தடுத்து பந்துவீச்சாளர் பும்ரா படைக்கவுள்ள சாதனைகள் குறித்து காணலாம்

இந்தியா- ஆஸ்திரேலியா இடையே 5 போட்டிகளைக் கொண்ட டெஸ்ட் தொடரில், இரு அணிகளும் தலா ஒரு போட்டியில் வெற்றிபெற்ற நிலையில், மூன்றாவது போட்டி, பிரிஸ்பேன் மைதானத்தில் நடைபெற்றது. டாஸ் வென்ற இந்திய அணி பந்துவீச்சை தேர்வு செய்தது. இதனை தொடர்ந்து பேட்டிங்கில் களமிறங்கிய ஆஸ்திரேலிய அணி முதல் இன்னிங்ஸில் 445 ரன்களைக் குவித்தது. இதனைத் தொடர்ந்து ஆடிய இந்திய அணி, தொடக்கத்திலேயே திணறியது. கே.எல்.ராகுல் மற்றும் ரவீந்திர ஜடேஜாவின் அரை சதங்களால் பாலோ ஆனை இந்திய அணி தவிர்த்தது.

இதனைத் தொடர்ந்து கடைசி விக்கெட்டும் ஆட்டமிழக்க 260 ரன்களுக்கு இந்திய அணி தனது முதல் இன்னிங்ஸை முடித்தது. முதல் இன்னிங்ஸில் 185 ரன்களை ஆஸ்திரேலிய அணி கூடுதலாகப் பெற்றது, இருப்பினும் மழையின் காரணமாக ஆஸ்திரேலிய அணி இரண்டாவது இன்னிங்ஸை தொடங்குவதில் தாமதம் ஏற்பட்டது. இதன்பின் தொடங்கிய ஆட்டத்தில் இந்திய பந்துவீச்சாளர்கள் வேகம் காட்டினர். இரண்டாவது இன்னிங்ஸில் மொத்தம் 18 ஓவர்கள் மட்டுமே வீசப்பட்ட நிலையில் ஆஸ்திரேலிய அணி 7 விக்கெட்களை இழந்தது. இந்த ஆட்டத்தில் 89 ரன்களுக்கு 7 விக்கெட்டை இழந்திருந்த நிலையில் ஆட்டத்தை டிக்ளேர் செய்தது.

இதன்மூலம் ஆஸ்திரேலிய அணி 274 ரன்கள் முன்னிலை பெற்றது. இதனை அடுத்து இந்திய அணிக்கு 275 ரன்கள் இலக்காக நிர்ணயிக்கப்பட்டது. இந்நிலையில் ஆட்டத்தை தொடங்கிய இந்திய அணி 8 ரன்கள் எடுத்த போது மழையினால் ஆட்டம் தடைபட்டது. மோசமான வானிலை காரணமாக ஆட்டத்தை கைவிடுவது என இரு அணிகளும் முடிவு செய்தது. அதனடிப்படையில் இந்திய – ஆஸ்திரேலிய இடையே நடைபெற்ற 3-வது போட்டி டிரா என அறிவிக்கப்பட்டது. இதன்மூலம் 5 போட்டிகள் கொண்ட டெஸ்ட் தொடர் 1-1 என்ற கணக்கில் சமனில் உள்ளது.

இந்தியா - ஆஸி இடையேயான 4-வது டெஸ்ட் போட்டி வருகிற 26-ந் தேதி தொடங்குகிறது. இந்திய அணியின் முன்னணி வேகப்பந்து வீச்சாளரான பும்ரா 2 மாபெரும் சாதனைகள் படைக்க வாய்ப்புள்ளதாக கூறப்படுகிறது. பார்டர் கவாஸ்கர் போட்டியில் இதுவரை நடைபெற்று முடிந்த ஆட்டங்களில் பும்ரா 21 விக்கெட்டுகளை வீழ்த்தியுள்ளார். மேலும் எஞ்சியுள்ள 2 போட்டிகளில் அவர் 5 விக்கெட்டுகளை வீழ்த்தும் பட்சத்தில் ஆஸ்திரேலிய அணிக்கு எதிராக ஒரு டெஸ்ட் தொடரில் அதிக விக்கெட்டுகளை வீழ்த்திய இந்திய வீரர் என்ற மாபெரும் சாதனையை படைப்பார். இதற்கு முன்னர் முன்னாள் வீரரான கபில் தேவ் ஆஸ்திரேலிய அணிக்கு எதிரான ஒரு தொடரில் 25 விக்கெட்டுகளை வீழ்த்தி இருந்தார்.

இதேபோல இந்திய அணிக்காக இதுவரை 43 டெஸ்ட் போட்டிகளில் விளையாடியுள்ள அவர் 194 விக்கெட்டுகளை வீழ்த்தியுள்ளார். மேலும் அவர் 6 விக்கெட்டுகளை வீழ்த்தினால் 200 விக்கெட்டுகளை விரைவாக வீழ்த்திய 2-வது வீரர் என்ற சாதனையை படைப்பார். இந்த பட்டியலில் அஸ்வின் முதலிடத்தில் உள்ளார் என்பது குறிப்பிடத்தக்கது.