விநாயகர் சிலை ஊர்வலம் - சென்னை போக்குவரத்து மாற்றம், காவல்துறை பாதுகாப்புத் தீவிரம்!

விநாயகர் சதுர்த்தியை முன்னிட்டு, ஆகஸ்ட் 31, 2025 அன்று சென்னையில் உள்ள பல்வேறு பகுதிகளிலிருந்து ஏராளமான விநாயகர் சிலைகள் ஊர்வலமாகப் பட்டினப்பாக்கம், திருவான்மியூர், வண்ணாரப்பேட்டை, மற்றும் திருவொற்றியூர் போன்ற கடற்கரைப் பகுதிகளுக்குக் கொண்டு செல்லப்பட உள்ளன. இந்த ஊர்வலத்தால் ஏற்படும் போக்குவரத்து நெரிசலைக் குறைக்கவும், பொதுமக்களின் பாதுகாப்பை உறுதி செய்யவும் சென்னை பெருநகரக் காவல்துறை விரிவான ஏற்பாடுகளைச் செய்துள்ளது.

போக்குவரத்து மாற்றம் மற்றும் மாற்று வழிகள்

சிலை ஊர்வலங்கள் மற்றும் பாதசாரிகளின் கூட்டம் அதிகமாக இருக்கும் என்பதால், முக்கியச் சாலைகளில் போக்குவரத்து மாற்றங்கள் அறிவிக்கப்பட்டுள்ளன.

• திருவல்லிக்கேணி முதல் சாந்தோம் வரை: திருவல்லிக்கேணியிலிருந்து சாந்தோம் நெடுஞ்சாலை நோக்கி வரும் வாகனங்கள், ஆர்.கே. சாலை சந்திப்பிலிருந்து வலதுபுறம் திரும்பி, வி.எம். தெரு, லஸ் சந்திப்பு, டிசில்வா சாலை, டாக்டர். ரங்கா சாலை, மற்றும் சி.பி. ராமசாமி சாலை வழியாகச் சென்று, ஸ்ரீனிவாசா அவென்யூவை அடைந்து, ஆர்.கே. மடம் சாலை வழியாகத் தங்கள் இலக்கை அடையலாம்.
• அடையாறு முதல் சாந்தோம் வரை: அடையாறிலிருந்து சாந்தோம் நெடுஞ்சாலை நோக்கி வரும் வாகனங்கள், ஆர்.கே. மடம் சாலை, திருவேங்கடம் தெரு, தேவநாதன் தெரு வழியாகச் சென்று, செயின்ட் மேரிஸ் சாலை, லஸ் அவென்யூ, ராயப்பேட்டை நெடுஞ்சாலை, மற்றும் டாக்டர் ஆர்.கே. சாலை வழியாகத் தங்கள் இலக்கை அடையலாம்.
• ரத்னா கஃபே சந்திப்பு: சிலை ஊர்வலம் ரத்னா கஃபே சந்திப்பைக் கடக்கும்போது, ஜாம் பஜார் காவல் நிலையத்திலிருந்து ரத்னா கஃபே சந்திப்புக்கு வரும் வாகனங்கள் செல்ல அனுமதிக்கப்படாது. அவை ஜானி ஜான்கான் ரோடு வழியாகத் திருப்பி விடப்படும்.
• திருவல்லிக்கேணி நெடுஞ்சாலை: ஐஸ் ஹவுஸ் சந்திப்பிலிருந்து ரத்னா கஃபே சந்திப்பு நோக்கி வரும் வாகனங்கள், ஊர்வலம் கடக்கும்போது அனுமதிக்கப்படாது. இந்த வாகனங்கள் பெசன்ட் ரோடு-காமராஜர் சாலை வழியாகத் திருப்பி விடப்படும்.

லூப் சாலை: கலங்கரை விளக்கத்திலிருந்து ஸ்ரீனிவாசபுரம் சிலை கரைக்கும் இடத்திற்கு, விநாயகர் சிலைகளை ஏற்றி வரும் வாகனங்கள் மட்டுமே லூப் சாலை

வழியாக அனுமதிக்கப்படும்.

• வணிக வாகனங்களுக்குத் தடை: சிலை கரைக்கும் இடங்களைச் சுற்றி சுமார் 10 கி.மீ சுற்றளவிற்கு எந்தவிதமான வணிக வாகனங்களும் செல்ல அனுமதிக்கப்படாது.

காவல்துறையின் இந்த ஏற்பாடுகளுக்கு பொதுமக்கள் மற்றும் வாகன ஓட்டிகள் முழு ஒத்துழைப்பு வழங்க வேண்டும் என்று கேட்டுக் கொள்ளப்பட்டுள்ளனர். இந்த ஊர்வலம் மற்றும் சிலை கரைப்பு நிகழ்வுகள் அமைதியாகவும், பாதுகாப்பாகவும் நடைபெற விரிவான பாதுகாப்பு ஏற்பாடுகள் செய்யப்பட்டுள்ளன.