ஆப்கானிஸ்தானை உலுக்கிய நிலநடுக்கம்... ரிக்டர் அளவில் 4.9 ஆக பதிவு!

ஆப்கானிஸ்தான், யூரேசிய மற்றும் இந்திய டெக்டோனிக் தகடுகள் மோதும் இந்துகுஷ் மலைத்தொடருக்கு அருகில் அமைந்துள்ளது. இந்தத் தட்டுகளின் தொடர்ச்சியான மோதல் புவியியல் அழுத்தத்தை உருவாக்குகிறது. இது அடிக்கடி பூகம்பங்களுக்கு வழிவகுக்கிறது. இதன் காரணமாக ஆப்கானிஸ்தான் அவ்வப்போது நிலநடுக்கம் ஏற்படுகிறது.

அந்த வகையில், கடந்த பிப்.9ம் தேதி ஆப்கானிஸ்தானை நிலநடுக்கம் உலுக்கியது. இது ரிக்டர் அளவில் 4.1 ஆக பதிவானது. இதனைத் தொடர்ந்து, கடந்த 13ம் தேதி 4.0 ரிட்கர் அளவில் நிலநடுக்கம் ஏற்பட்டது. இந்த நிலையில், ஆப்கானிஸ்தானில் இன்று (மார்ச் 21) மீண்டும் நிலநடுக்கம் ஏற்பட்டுள்ளது. தேசிய நில அதிர்வு மையம் (NCS) அளித்த தகவலின் படி, இந்த நிலநடுக்கம் இன்று அதிகாலை 1 மணியளவில் காபுல் நகரத்திற்கு அருகே ஏற்பட்டது.

இதன் ரிக்டர் அளவு 4.9 ஆக பதிவாகியுள்ளது. இந்த நிலநடுக்கம் 160 கிலோமீட்டர் ஆழத்தில் ஏற்பட்டது. நிலநடுக்கத்தை உணர்ந்த மக்கள் தங்கள் வீடுகளை விட்டு வெளியேறி வீதிகளில் தஞ்சமடைந்தனர். இந்த நிலநடுக்கத்தால் ஏற்பட்ட இழப்புகள் குறித்த எந்த தகவலும் இதுவரை வெளியாகவில்லை. மேலும், சுனாமி எச்சரிக்கை ஏதும் விடுக்கப்படவில்லை.