#Diwali பண்டிகை | தமிழ்நாட்டில் பள்ளி, கல்லூரிகளுக்கு நாளை அரைநாள் விடுமுறை!

தீபாவளி பண்டிகையை முன்னிட்டு நாளை (அக்.30) பள்ளி, கல்லூரிகளுக்கு அரை நாள் விடுமுறை அறிவித்து தமிழ்நாடு அரசு உத்தரவிட்டுள்ளது.

தீபாவளி பண்டிகை நாளை மறுநாள் (அக்.31) கோலகலமாக கொண்டாடப்பட உள்ளது. தீபாவளி நெருங்கி உள்ளதை அடுத்து மக்கள் புத்தாடை, பட்டாசு உள்ளிட்டவை வாங்க கடைகளில் குவிந்து வருகின்றனர். இதனால் ஜவுளி, பட்டாசு கடைகளில் வியாபாரம் களை கட்டியுள்ளது. இதற்கிடையே, சென்னை உள்ளிட்ட மாநகரங்களில் வேலை, கல்விக்காக தங்கி இருப்பவர்கள் சொந்த ஊர் நோக்கி படையெடுக்க தொடங்கி உள்ளனர்.

தீபாவளி பண்டிகை வியாழக்கிழமை கொண்டாடப்பட உள்ள நிலையில், அதற்கு அடுத்த நாள் அதாவது வெள்ளிக்கிழமை (நவ.1) அனைத்து அரசு அலுவலகங்கள், பொதுத்துறை நிறுவனங்கள், பள்ளி, கல்லூரிகளுக்கு விடுமுறை அறிவித்து தமிழ்நாடு அரசு உத்தரவிட்டிருந்தது. இந்த நிலையில், தீபாவளிக்கு முதல் நாளான நாளை (அக்.30) பள்ளி, கல்லூரிகளுக்கு தமிழ்நாடு அரசு அரை நாள் விடுமுறை அறிவித்துள்ளது.

இது தொடர்பாக வெளியிடப்பட்டுள்ள அறிக்கையில் கூறப்பட்டுள்ளதாவது,

"தமிழ்நாட்டில் தீபாவளி பண்டிகையை முன்னிட்டு பள்ளிகள், கல்லூரிகள் மற்றும் கல்வி நிறுவனங்கள் நாளை (30.10.2024) முற்பகல் மட்டும் செயல்படும். பிற்பகல் அரை நாள் விடுமுறை அறிவித்து, தமிழ்நாடு அரசு உத்தரவிட்டுள்ளது."

இவ்வாறு அதில் தெரிவிக்கப்பட்டுள்ளது.