'அரசன்' படத்தின் அப்டேட் கொடுத்த இயக்குநர் வெற்றிமாறன்!

நடிகர் சிலம்பரசன் 'தக் லைப்' திரைப்படத்தை தொடர்ந்து அடுத்ததாக இயக்குநர் வெற்றிமாறன் இயக்கும் படத்தில் நடிக்க இருக்கிறார். இப்படத்திற்கு ‘அரசன்’ என பெயரிடப்பட்டுள்ளது. இப்படம் வடசென்னையில் நடக்கும் கேங்ஸ்டர் திரைப்படமாக உருவாக இருக்கிறது. இந்த படத்தில், சமுத்திரக்கனி, கிஷோர், ஆண்ட்ரியா, இயக்குனர் நெல்சன் உள்ளிட்டோர் நடிக்க உள்ளதாக கூறப்படுகிறது. கலைப்புலி எஸ்.தாணு தயாரித்து வரும் இந்த படத்தில் சிம்பு இளமை மற்றும் முதுமை என 2 தோற்றத்தில் நடிப்பதாகவும் சொல்லப்படுகிறது.

'வடசென்னை' படத்துடன் தொடர்புடைய அதே காலகட்டத்துடன் தொடர்புடைய மற்றொரு கதையாக இப்படம் உருவாகி வருவதாக தகவல் வெளியாகியுள்ளது. இதற்கிடையே, 'அரசன்' படத்தின் புரோமோ வீடியோ சமீபத்தில் வெளியாகி படத்தின் மீதான எதிர்பார்ப்பை அதிகரிக்கச் செய்தது.

மேலும் 'அரசன்' படம் தெலுங்கிலும் வெளியாக உள்ளதாக தெரிகிறது. இந்த நிலையில், 'அரசன்' படத்தின் அப்டேட் வெளியாகியுள்ளது. அதன்படி, 'அரசன்' படத்தின் படப்பிடிப்பு நவ.24 ஆம் தேதி தொடங்க உள்ளதாக இயக்குனர் வெற்றிமாறன் அறிவித்துள்ளார். இதனால் இப்படத்தின் அப்டேட்கள் அடுத்தடுத்து வெளியாகலாம் என எதிர்பார்க்கப்படுகிறது.