'டிடி ரிட்டன்ஸ் 2' படத்தின் டீசர் எப்போது? வெளியான தகவல்!

சந்தானம் நடிப்பில் உருவாகி வரும் 'டிடி ரிட்டன்ஸ் 2' திரைப்படத்தின் டைட்டில் டீசர் வரும் பொங்கலுக்கு வெளியாகும் என தகவல் வெளியாகியுள்ளது. 

கோலிவுட்டில் நகைச்சுவை நடிகராக அறிமுகமாகி, இன்று முன்னணி நடிகர்களில் ஒருவராக வலம் வருபவர் சந்தானம். விஜய், அஜித், சூர்யா, தனுஷ், ரஜினி, உதயநிதி, ஆர்யா, சிம்பு, ஜீவா, என அனைத்து முன்னணி நடிகர்களின் திரைப்படங்களில் இவர் நகைச்சுவை கதாபாத்திரத்தில் நடித்திருக்கிறார். 'வல்லவனுக்கு புல்லும் ஆயுதம்' என்ற படத்தின் மூலம் கதாநாயகனாக அறிமுகமான சந்தானம், அடுத்தடுத்து ஹீரோவாக நடித்தார்.

கடந்த 2023ம் ஆண்டு அவரது நடிப்பில் வெளியான 'டிடி ரிட்டன்ஸ்' திரைப்படம் ரசிகர்கள் மத்தியில் நல்ல வரவேற்பை பெற்றது. இப்படம் ரூ.25 கோடிக்கு மேல் வசூலித்து வசூல் ரீதியாகவும் நல்ல வரவேற்பை பெற்றது. இதனையடுத்து, இப்படத்தின் இரண்டாம் பாகம் உருவாகி வருகிறது.

முதல் பாகத்தை இயக்கிய பிரேம் குமாரே இதன் இரண்டாம் பாகத்தையும் இயக்குகிறார். 'டிடி ரிட்டன்ஸ் 2' படத்தில் நிழல்கள் ரவி, லொள்ளு சபா மாறன், ரெடின் கிங்ஸ்லி உள்ளிட்ட பலர் நடித்து வருகின்றனர். நடிகர் ஆர்யா இப்படத்தை தயாரிக்கிறார். மேலும், ஆர்யா இப்படத்தில் முக்கிய கதாபாத்திரத்தில் நடிப்பதாக கூறப்படுகிறது.

இந்த படத்தின் படப்பிடிப்பு பாண்டிச்சேரி பகுதிகளில் விறுவிறுப்பாக நடைபெற்று வருகிறது. மேலும் இப்படத்தின் படப்பிடிப்பு கப்பலில் நடந்து வருவதாக சொல்லப்படுகிறது. இந்த மாதத்திற்குள் படத்தின் பணிகள் முழுவதும் நிறைவடைந்து விடும் எனவும் இப்படத்தின் டைட்டில் டீசர் வருகின்ற பொங்கல் தினத்தை முன்னிட்டு வெளியாக இருப்பதாகவும் தகவல்கள் வெளியாகியுள்ளது.