#ChennaiGrandMasters | 3-வது சுற்றில் அர்ஜுன் எரிகைசி வெற்றி - உலக தரவரிசையில் 2-வது இடத்துக்கு முன்னேற்றம்!

சென்னை கிராண்ட் மாஸ்டர்ஸ் 3-வது சுற்றில் வெற்றி பெற்ற அர்ஜுன் எரிகைசி உலக தரவரிசையில் 2-வது இடத்துக்கு முன்னேறியுள்ளார்.

தமிழ்நாடு விளையாட்டு மேம்பாட்டு ஆணையம் சார்பில் 2-வது சென்னை கிராண்ட்மாஸ்டர்ஸ் செஸ் சாம்பியன்ஷிப் போட்டி கோட்டூர்புரத்தில் உள்ள அண்ணா நூற்றாண்டு நூலகத்தில் நடந்து வருகிறது. 7 சுற்று கொண்ட இந்த போட்டியில் நேற்று 3-வது சுற்று நடந்தது. இதன் மாஸ்டர்ஸ் பிரிவில், கருப்பு நிற காய்களுடன் ஆடிய இந்திய வீரர் அர்ஜூன் எரிகைசி 39-வது காய் நகர்த்தலில் அலெக்சி சாரனாவை (செர்பியா) தோற்கடித்தார்.

இந்தியாவின் அரவிந்த் சிதம்பரம்- விதித் குஜராத்தி இடையிலான ஆட்டம் டிராவில் முடிந்தது. மற்ற ஆட்டங்களில் ஈரானின் அமீன் தபதாபேயி, பிரான்சின் மேக்சிம் வாச்சியர் லாக்ரேவையும், அமெரிக்காவின் லெவோன் ஆரோனியன், ஈரானின் பர்ஹாம் மக்சூட்லூவையும் 'செக்' வைத்து மடக்கினர். 3-வது சுற்று முடிவில் அர்ஜூன் எரிகைசி, தபதாபேயி தலா 2½ புள்ளிகளுடன் முதலிடத்தில் உள்ளனர்.

இதையும் படியுங்கள் : “திமுக கூட்டணியில் தான் தொடர்கிறோம், உறுதியாகத் தொடர்வோம்” – விசிக தலைவர் திருமாவளவன்!

இன்று 4-வது சுற்று நடைபெறும். இதற்கிடையே 3-வது சுற்றில் கிடைத்த வெற்றியின் மூலம் அர்ஜூன் எரிகைசி, லைவ் ரேட்டிங் தரவரிசையில் (2,805.8 புள்ளி) இரு இடங்கள் முன்னேறி 2-வது இடத்தை பிடித்துள்ளார். நார்வேயின் மாக்னஸ் கார்ல்சென் (2,831 புள்ளி) முதலிடத்தில் தொடருகிறார்.

சேலஞ்சர்ஸ் பிரிவில் இந்திய வீரர் பிரனேஷ் 46-வது நகர்த்தலில் தமிழ்நாடு வீராங்கனை வைஷாலியையும், தமிழ்நாடு வீரர் பிரணவ் 69-வது காய் நகர்த்தலில் கார்த்திகேயன் முரளியையும் வீழ்த்தினர். சத்வானி- லியோன் மென்டோன்கோ, ஹரிகா- அபிமன்யு ஆகியோர் இடையிலான மோதல்கள் 'டிரா' ஆனது. இந்த பிரிவில் 3 புள்ளிகளுடன் பிரணவ் முதலிடத்தில் உள்ளார்.