“தலைவரு நிரந்தரம்...” - கோடிக்கணக்கான இளைஞர்களின் ட்ரூ இன்ஸ்பிரேஷன் | "புரூஸ் லீ" பிறந்தநாள் ஸ்பெஷல்!

உலகப் புகழ்பெற்ற தற்காப்புக் கலை வீரர் மட்டுமல்ல. ஹாங்காங் மற்றும் அமெரிக்க நடிகர், திரைப்படத் தயாரிப்பாளர், இயக்குநர், நுண்கலைஞர், திரைக்கதை எழுத்தாளர் மற்றும் உலகப் புகழ்பெற்ற தத்துவஞானி எனப் பலதரப்பட்ட மற்றும் பன்முக ஆளுமையின் பெயர் புரூஸ் லீ....                    

புரூஸ் லீ-யை உலகின் சிறந்த தற்காப்புக் கலைஞர் என்று மக்கள் அழைக்கிறார்கள். லீ, ஒரு தற்காப்புக் கலைஞராக இருப்பதுடன், ஹாங்காங் மற்றும் அமெரிக்க நடிகர், தத்துவவாதி, தயாரிப்பாளர், இயக்குனர், திரைக்கதை எழுத்தாளர் மற்றும் ஜீத் குனே டோ தற்காப்புக் கலையின் நிறுவனர் ஆவார்.

அவர் தனது படைப்புகளால் மிகக் குறுகிய காலத்தில் மக்களின் இதயங்களில் ஒரு இடத்தைப் பிடித்தார். இதன் காரணமாக அவர் இன்றளவும் சிறந்த தற்காப்பு கலைஞர்களில் ஒருவர் என்று அழைக்கப்பட்டார். இளம் வயதிலேயே சினிமாவில் நுழைந்து குழந்தை நட்சத்திரமாக பிரபலமானார்.

புரூஸ் லீ பிறப்பு, குடும்பம் மற்றும் ஆரம்ப வாழ்க்கை:

புரூஸ் லீயின் தந்தை லீ ஹோய்-சுயென் மற்றும் அவரது தாயார் கிரேஸ் ஹோ. லீ மூன்று மாத குழந்தையாக இருந்த போது, ​​​​அவரது குடும்பம் ஹாங்காங்கிற்கு மாறியது. லீக்கு மேலும் நான்கு உடன்பிறப்புகள் இருந்தனர். அவர் ஒரு வசதியான குடும்பத்தைச் சேர்ந்தவர். அவரது முதல் ஆசிரியர் அவரது தந்தை, லீக்கு அடிப்படைகளை கற்பித்தார். 13 வயதில், யிப் மேனின் கீழ் விங் சுன் பயிற்சி பெறத் தொடங்கினார். கல்விரீதியாக, லீ தனது ஆரம்பக் கல்வியை 'லா சாலே கல்லூரியில்' பெற்றார். ஆனால், நல்ல மதிப்பெண்கள் கிடைக்காததால், அங்கிருந்து அகற்றப்பட்டு, 'செயின்ட் பிரான்சிஸ் சேவியர் கல்லூரியில்' சேர்த்தனர்.

அவர் 1959-ல் சான் பிரான்சிஸ்கோவிற்கு இடம் பெயர்வது வரை தெருச் சண்டைகளில் அவரது பங்கேற்பு தொடர்ந்தது. லீயின் வன்முறை நடத்தையால் லீயின் பெற்றோர் மிகவும் கவலையடைந்தனர். மேலும் பாதுகாப்பான மற்றும் ஆரோக்கியமான வழிக்காக ஹாங்காங்கை விட்டு வெளியேற விரும்பினர். சான் பிரான்சிஸ்கோவில் சில மாதங்களுக்குப் பிறகு, அவர் சியாட்டிலுக்குச் சென்றார். அங்கு அவர் தனது மேல் படிப்பை முடிக்க எடிசன் தொழில்நுட்பப் பள்ளியில் சேர்ந்தார். இதற்கிடையில், அவர் ரூபி சோவின் உணவகத்தில் வெயிட்டராக பணியாற்றினார். 1961 இல், அவர் வாஷிங்டன் பல்கலைக்கழகத்தில் சேர்ந்தார். அங்கு அவர் நாடகத்தில் தேர்ச்சி பெற்றார்.

புரூஸ் லீ-யின் சினிமா பயணம்:

கான்டோனீஸ் ஓபரா நட்சத்திரமாக இருந்த லீ-யின் தந்தை, திரைப்பட பின்னணியுடன் தொடர்புடையவர். இதன் மூலம் லீ  "கோல்டன் கேட் கேர்ள்" படத்தில் முதல் முறையாக நடித்தார். பின் ஒவ்வொரு படத்திலும் அவரது நடிப்புத் திறன் அதிகரித்துக்கொண்டே இருந்தது. அவர் அந்த நேரத்தில் சுமார் 18 முதல் 20 படங்களில் நடித்தார். 1959 முதல் 1964 வரை நடித்த பிறகு, அவர் தனது நடிப்பு வாழ்க்கையை விட்டுவிட்டு தற்காப்பு கலையை தனது தொழிலாக மாற்றினார். அவர் சியாட்டிலில் "லீ ஜுன் ஃபென் குங் ஃபூ நிறுவனம்" என்ற பெயரில் தனது சொந்த தற்காப்புக் கலைப் பள்ளியைத் தொடங்கினார்.

1964 இல், லீ லாங் பீச் இன்டர்நேஷனல் கராத்தே சாம்பியன்ஷிப்பில் பங்கேற்றார் லீ. அங்கு அவர் தனது '2-ஃபிங்கர் புஷ்-அப்' மற்றும் 'ஒன் இன்ச் பஞ்ச்' ஆகியவற்றால் பிரபலமானார். அவரது செயல்திறன் அவரை ஹாலிவுட் இயக்குனர்களின் வெளிச்சத்திற்கு கொண்டு வந்தது. இதன்மூலம் 'தி கிரீன் ஹார்னெட்' என்ற தொலைக்காட்சி தொடரில் நடிக்க வாய்ப்பு கிடைத்தது.  நிகழ்ச்சி 1966 இல் தொடங்கியது மற்றும் அதன் முதல் சீசன் 1967 வரை ஓடியது.

1967 முதல் 1969 வரை அவர் பல தொலைக்காட்சி தொடர்களில் நடிக்க அழைக்கப்பட்டார். இதில் 'அயர்ன்சைட்', 'ஹியர் கம்ஸ் தி ப்ரைட்ஸ்' மற்றும் 'ப்ளாண்டி' போன்ற தொடர்கள் அடங்கும். நடிப்புக்கு இடையில் சிறிது நேரம் ஒதுக்கி தற்காப்பு கலைகளில் கவனம் செலுத்தி வந்தார். பாரம்பரிய தற்காப்பு கலை நுட்பங்களில் அவர் மிகவும் திறமையானவர் என்பதை அவர் உணர்ந்தார். பின்னர் 1971 கோடையில் லாஸ் ஏஞ்சல்ஸை விட்டு ஹாங்காங்கிற்கு சென்றார். ஹாங்காங்கை அடைந்ததும், லீ இரண்டு படங்களில் ஒப்பந்தமானார். 1972ல் 'வே ஆஃப் டிராகன்' படத்தில் ஒரு சண்டைக் காட்சியின் நடிகராகவும், எழுத்தாளராகவும், இயக்குநராகவும், நடிகராகவும், நடன இயக்குநராகவும் இருந்தார். அதே ஆண்டில் அவருக்கு மற்றொரு படம் வழங்கப்பட்டது, அதன் பெயர் 'இன்டர் தி டிராகன்'. இந்த படம் 26 ஜூலை 1973 அன்று வெளியாக இருந்தது. இந்த படம் அவரை புகழின் உச்சத்திற்க்கு அழைத்து சென்றது.

புரூஸ் லீயின் தனிப்பட்ட வாழ்க்கை:

வாஷிங்டன் பல்கலைக்கழகத்தில் படிக்கும் போது, ​​அவர் லிண்டா எமரியை சந்தித்தார். அவருடன் அவர் 1964 இல் இருவரும் திருமணம் செய்துகொண்டனர். அவர்களுக்கு 2 குழந்தைகள் பிறந்தனர். ஒரு பிராண்டன் லீ மற்றும் மற்றொருவர் ஷானன் லீ.

புரூஸ் லீ மரணம்:

1973ஆம் ஆண்டு மே 10ஆம் தேதி 'இன்டர் தி டிராகன்' படத்திற்கு டப்பிங் பேசிக் கொண்டிருந்தபோது, ​​தலைவலி மற்றும் வலிப்பு வந்த பிறகும் திடீரென சரிந்து விழுந்தார். உடனடியாக, அவர் ஹாங்காங்கில் உள்ள பாப்டிஸ்ட் மருத்துவமனையில் அனுமதிக்கப்பட்டார், அங்கு அவருக்கு மூளையில் வீக்கம் இருப்பது கண்டறியப்பட்டது.

பின்னர், நோயிலிருந்து அவர் குணமடைந்தார். 20 ஜூலை 1973 இல், அவர் ஜேம்ஸ் பாண்ட் நட்சத்திரமான ஜார்ஜ் லேசன்பியைச் சந்திக்கத் திட்டமிடப்பட்டார். இதனிடையே மீண்டும் தலைவலி காரணமாக வலி நிவாரணி மருந்துகளை உட்கொண்டு உறங்கியவர் திரும்ப எழவே இல்லை.

அவர் குயின் எலிசபெத் மருத்துவமனைக்கு கொண்டு செல்லப்பட்டார். அங்கு அவர் இறந்து விட்டதாக அறிவிக்கப்பட்டது. அவர் தனது மனைவியின் சொந்த ஊரான சியாட்டில் லேக்வியூ கல்லறையில் அடக்கம் செய்யப்பட்டார். ஹாங்காங்கில் உள்ள அவரது வீட்டை ஒரு சுற்றுலாத் தலமாக மாற்றியமைக்கபட்டுள்ளது.

புரூஸ் லீ சாதனைகள்:

• மரணத்திற்குப் பின், அவர் டைம் பத்திரிகையின் "20 ஆம் நூற்றாண்டின் மிகவும் செல்வாக்கு மிக்க 100 நபர்கள்" பட்டியலில் பட்டியலிடப்பட்டார்.
• 2013-ம் ஆண்டில், ஆசிய விருதுகளில் மதிப்புமிக்க நிறுவனர் விருதுகள் அவருக்கு வழங்கப்பட்டது. அதே ஆண்டில், லாஸ் ஏஞ்சல்ஸில் உள்ள சைனாடவுனில் அவரது சிலை திறக்கப்பட்டது.
• தற்காப்புக் கலை பயிற்றுவிப்பாளராக அவர் செய்த சாதனைகளை பெருமையுடன் நினைவுகூரும் வகையில், சீனாவின் குவாங்சூ நகரில் 7 அடி உயர சிலை அமைக்கப்பட்டுள்ளது.

புரூஸ் லீ பற்றிய சில சுவாரஸ்யமான தகவல்கள்:

• கவிதை எழுதுவது புரூஸ் லீயின் ஒரு ரகசிய பொழுதுபோக்காக இருந்தது.
• புரூஸ் லீ ஹாங்காங்கின் மிக முக்கியமான குழந்தை நடிகர்களில் ஒருவர். அவருக்கு 18 வயதாகும் போது 20 படங்களில் நடித்திருந்தார்.
• புரூஸுக்கு 13 வயதாக இருந்தபோது, ​​கிராண்ட்மாஸ்டர் 'யி' ஐப் மூலம் அவருக்கு 'விங் சுன்' கற்பிக்கப்பட்டது.
• ஜாக்கி சான், புரூஸ் லீயின் 'ஃபிஸ்ட் ஆஃப் ப்யூரி' மற்றும் 'என்டர் தி டிராகன்' படங்களில் ஸ்டண்ட்மேனாக தனது வாழ்க்கையைத் தொடங்கினார்.
• புரூஸ் லீ ஒரு சிறந்த சா-சா நடனக் கலைஞராகவும் அறியப்பட்டார். அவர் 1958 இல் ஹாங்காங் சா-சா சாம்பியன்ஷிப்பையும் வென்றார்.
• புரூஸ் லீயின் கடைசிப் படமான 'கேம்ஸ் ஆஃப் டெத்'.

புரூஸ் லீயின் விலைமதிப்பற்ற வார்த்தைகள்:

உங்கள் மனதை வெறுமையாக்குங்கள், தண்ணீரைப் போன்று உருவமற்று வடிவமற்று இருங்கள். நீங்கள் தண்ணீரை ஒரு கோப்பையில் ஊற்றினால் அது கோப்பையாக மாறும்.நீங்கள் அதை ஒரு குடுவையில் ஊற்றினால் அது குடுவையாக மாறும். தண்ணீரால் தடைகளை கடந்து செல்லவும் முடியும் அல்லது அதை உடைத்து எறியவும் முடியும்.

 

வாழ்க்கையே உங்கள் ஆசிரியர், நீங்கள் தொடர்ந்து கற்றுக்கொண்டே இருக்கிறீர்கள்.

 

10000 அடிமுறைகளை ஒருதடவை பயிற்சி செய்தவனைப் பார்த்து நான் அஞ்சவில்லை. ஆனால் ஒரு அடிமுறையை 10000 தடவைகள் பயிற்சி செய்தவனைப் பார்த்து நான் அஞ்சுகிறேன்.

 

நீங்கள் எதையாவது சாத்தியமற்றது என்று கூறும்போது, நீங்கள் அதை சாத்தியமற்றதாக ஆக்கியுள்ளீர்கள்.

 

மகிழ்ச்சியாக இருங்கள், ஆனால் ஒருபோதும் திருப்தி அடையாதீர்கள்.

 

உங்களைச் சுற்றி என்ன நடக்கிறது என்பதை அமைதியாகக் கவனித்துக் கொண்டிருங்கள்.

 

எளிமையே திறமைக்கான திறவுகோல்.

 

நாம்  இருளில் நடக்கிறோம் என்ற விழிப்புணர்வே இல்லாதவர்கள் ஒருபோதும் ஒளியைத் தேடிச்செல்ல மாட்டார்கள்.

 

மக்கள் ஒரேமாதிரியாக இருக்க முயற்சிசெய்கிறார்கள். இதுவே அவர்களின் வளர்ச்சியைத் தடுக்கிறது.

 

கற்றுக்கொள்வது மட்டுமே போதாது அதை உபயோகிக்க வேண்டும்.

 

நாம் பிரச்சனைகளை ஆராயும்போது தீர்வைக் கண்டுபிடிக்கிறோம். பிரச்சனை வேறு தீர்வு வேறல்ல, பிரச்சனையே தீர்வாகும். பிரச்சனையை புரிந்துகொள்வது பிரச்சனையை கரைந்துபோகச் செய்கிறது.

 

தவறுகள் எப்போதும் மன்னிக்கப்படக்கூடியவை, அவற்றை ஒப்புக்கொள்ள தைரியம் இருந்தால்.

 

உங்களைத் தவிர உங்களுக்கு வேறு யாரும் உதவ முடியாது என்ற உண்மையை நீங்கள் ஏற்றுக்கொள்ள வேண்டும். சுதந்திரம் உங்களுக்குள் இருக்கும் போது அதை எப்படி அடைவது என்று என்னால் கூற முடியாது.

 

 

நீங்கள் நினைப்பது போல், நீங்கள் ஆகிறீர்கள்.

 

 

எப்பொழுதும் நீங்கள் நீங்களாகவே இருங்கள், உங்களை வெளிப்படுத்துங்கள். வெளியில் சென்று வெற்றிகரமான மனிதரை பார்த்து அவரைப் போலவே இருக்க முயற்சிக்காதீர்கள்.

 

 

விரக்தியடையாமல், உங்களால் எதையாவது செய்யமுடியும் என்பதை நீங்கள் கண்டுபிடிக்கமாட்டீர்கள். போராட்டங்கள் மூலமே நாங்கள் வளர்ச்சியடைகிறோம்.

 

ஆறாவது அறிவிற்கான தேடலில், ஐந்து புலன்களைப் புறக்கணிக்காதீர்கள்.

 

நீங்கள் வழக்கமாக என்ன நினைக்கிறீர்கள் என்பது பெரும்பாலும் நீங்கள் இறுதியில் என்ன ஆகிறீர்கள் என்பதைத் தீர்மானிக்கிறது.

 

 

தோல்விக்கு அஞ்சாதீர்கள். தோல்வி ஒரு குற்றமல்ல, ஆனால் சிறிய இலக்கே குற்றமாகும். பெரும் முயற்சிகள் தோல்வியுற்றாலும் கூட அவை போற்றத்தக்கவை.

 

இலகுவான வாழ்க்கைக்காக பிரார்த்தனை செய்யாதீர்கள், கடினமான வாழ்க்கையை தாங்கிக்கொள்வதற்கான வலிமைக்காக பிரார்த்தனை செய்யுங்கள்.