அவனியாபுரம் ஜல்லிக்கட்டு : நான்கு சுற்றுகள் முடிவில் 12 பேர் இறுதி சுற்றுக்கு தேர்வு!

உலகப் புகழ்பெற்ற மதுரை அவனியாபுரம் ஜல்லிக்கட்டுப் போட்டி பொங்கல் பண்டிகையை ஒட்டி காலை 6.30 மணிக்கு தொடங்கி நடைபெற்று வருகிறது. ஜல்லிக்கட்டு நிகழ்வை தமிழ்நாடு அமைச்சர் மூர்த்தி, மதுரை மாவட்ட ஆட்சியர் சங்கீதா துவக்கி வைத்தனர். இந்த ஜல்லிக்கட்டு போட்டியில் 1,100 காளைகள் மற்றும் 900 மாடுபிடி வீரர்கள் களம் காண்கின்றனர்.

வாடிவாசலில் இருந்து சீறி வரும் காளைகளை போட்டி போட்டு கொண்டு வீரர்கள் பிடிக்கின்றனர். வீரர்களுக்கு இரு சக்கர வாகனம், தங்க காசு, வெள்ளி காசு, ரொக்க பணம், குக்கர், வேட்டி, அண்டா போன்ற பாத்திரங்கள் உள்ளிட்ட பரிசு பொருட்கள் அறிவிக்கப்படுகின்றன. ஒரு சுற்றுக்கு 50 வீரர்கள் காளைகளை அடக்க களமிறக்கப்படுகின்றனர். 100 காளைகள் என ஒவ்வொரு மணி நேரத்திற்கும் காளைகள் களத்தில் களமாடுகின்றன.

ஒரு மணி நேரத்திற்கு ஒரு சுற்றாக போட்டி நடத்தப்பட்டு வருகிறது. ஒவ்வொரு சுற்றிலும் சிறந்த மாடுபிடி வீரர்கள் தேர்வு செய்யப்பட்டு, அவர்கள் இறுதி சுற்றில் பங்கேற்க தயாராகி வருகின்றனர். போட்டியானது மாலை 5 மணிவரை நடைபெறவுள்ளது. போட்டி நேரம் நீட்டிப்பு செய்வது தொடர்பாக போட்டியின் நிலையை பொறுத்து மாவட்ட ஆட்சியரால் முடிவு எடுக்கப்படும்.

போட்டியின் முடிவில் சிறந்த மாடுபிடி வீரருக்கு 8 லட்சம் மதிப்பிலான நிசான் கார் பரிசும், சிறப்பாக விளையாடும் காளையின் உரிமையாளருக்கு 11 லட்சம் மதிப்பிலான டிராக்டர் வாகனமும் முதல் பரிசாக வழங்கப்படவுள்ளது.

தற்போதுவரை நான்கு சுற்றுகள் நிறைவடைந்துள்ளன.

முதல் சுற்று முடிவு;

முதல் சுற்றில் களம் கண்ட காளைகள் : 73

பிடிபட்ட காளைகள் :11

முதல் சுற்றில் மஞ்சள் நிற டீ-சர்ட் அணிந்து வீரர்கள் களம் கண்டனர். முதல் சுற்றின் முடிவில் இறுதிச்சுற்றுக்கு தேர்வு செய்யப்பட்ட  வீரர் மணிகண்டன் காயம் காரணமாக போட்டியிலிருந்து விலகுவதாக தெரிவித்தார்.

1). 38 - மணிகண்டன்

2). 16 - சுஜித் தலா மூன்று காளைகளை பிடித்து இறுதி சுற்றுக்கு தகுதி பெற்றனர்.

இரண்டாம் சுற்று முடிவு; 

இரண்டாம் சுற்றில் களம் கண்ட காளைகள் : 82

பிடிபட்ட காளைகள் :  22

இரண்டாம் சுற்றில் இளஞ்சிவப்பு நிற டீ-சர்ட் அணிந்து வீரர்கள் களம் கண்டனர்.  இரண்டாம் சுற்று முடிவில் இடுப்பில் காயம் ஏற்பட்டு வீரர் டேவிட் மேல் சிகிச்சைக்காக மதுரை அரசு ராஜாஜி மருத்துவமனை அனுப்பி வைக்கப்பட்டுள்ளார். இரண்டாம் சுற்றில் இருந்து 5 பேர் இறுதி சுற்றுக்கு தேர்வு செய்யப்பட்டனர்.

மூன்றாம் சுற்று முடிவு ;

களம் கண்ட காளைகள் : 89

பிடிபட்ட காளைகள் : 27

மூன்றாம் சுற்று முடிவில் காயமடைந்த மாடுபிடி வீரர் ஒருவர் மேல்சிகிச்சைக்காக மருத்துவமனை அழைத்து செல்லப்பட்டுள்ளார். மூன்றாம் சுற்று முடிவில் 4 வீரர்கள் இறுதி சுற்றுக்கு தேர்வு செய்யப்பட்டனர்.

1). கார்த்தி, அவனியாபுரம் (B 107) - 8 காளைகள்

2). திவாகர், குன்னத்தூர் (B 139) - 7 காளைகள்

3). ராகவா, சோலையழகுபுரம் (B 105) - 3 காளைகள்

4). மனோஜ், அவனியாபுரம் (B 112) - 2 காளைகள்

அவனியாபுரத்தை சேர்ந்த வீரர் கார்த்திக் அதிகப்படியாக 8 காளைகளை பிடித்துள்ள சூழலில் இந்த ஆண்டும் முதல் பரிசு பெற வாய்ப்புள்ளது. 2022 மற்றும் 2024ஆம் ஆண்டை தொடர்ந்து இந்த ஆண்டும் முதல் பரிசு பெற வாய்ப்பு.

நான்காம் சுற்று முடிவு;

களம் கண்ட காளைகள் : 69

பிடிபட்ட காளைகள் : 11

நான்காம் சுற்று முடிவில் மாடுபிடி வீரர்கள் 7 பேர், மாட்டின் உரிமையாளர்கள் 5 பேர், பார்வையாளர் ஒருவர் என மொத்தம் 13 பேர் காயமடைந்தனர். ஒருவர் மேல்சிகிச்சைக்காக மருத்துவமனைக்கு கொண்டு செல்லப்பட்டுள்ளார். நான்காம் சுற்று முடிவில் ஒரே ஒரு வீரர் மட்டும் இறுதி சுற்றுக்கு தேர்வு செய்யப்பட்டுள்ளார்.

1). கடுக்கண் மணி, அரியலூர் ( GY 152) 3 காளைகள்.

தொடர்ந்து  ஐந்தாம் சுற்று நடைபெற்று வருகிறது.