அதிக தேசிய விருதுகளை பெற்ற இசையமைப்பாளர் #ARR!

2022-ம் ஆண்டிற்கான தேசிய சிறந்த பின்னணி இசையமைப்பாளர் விருது வென்ற ஏ.ஆர். ரஹ்மான்,  தேசிய விருதுகளை அதிகம் வென்ற இசையமைப்பாளர் என்ற பெருமையையும் பெற்றுள்ளார். 

மத்திய‌ அரசு ஒவ்வொரு ஆண்டும் தேசிய திரைப்பட விருதுகள் வழங்கி வருகிறது. இதில் சிறந்த நடிகர், நடிகை, இயக்குநர் தேர்ந்தெடுக்கப்பட்டு பல்வேறு பிரிவுகளில் விருது வழங்கி வருகிறது. அதன்படி 70வது தேசிய திரைப்பட விருதுகள் இன்று (ஆக.16) அறிவிக்கப்பட்டது. இந்த முறை 2022-ம் ஆண்டு தணிக்கை செய்யப்பட்ட திரைப்படங்களுக்கான விருதுகள் அறிவிக்கப்பட்டன.

இதில் மணிரத்னம் இயக்கத்தில் வெளியான ‘பொன்னியின் செல்வன் முதல் பாகம்’ படத்திற்கு சிறந்த தமிழ் மொழி திரைப்படத்திற்கான தேசிய விருது அறிவிக்கப்பட்டது. அதோடு சிறந்த பின்னணி இசையமைப்பு, சிறந்த ஒலி வடிவமைப்பு, சிறந்த ஒளிப்பதிவாளர் ஆகிய பிடிவுகளிலும் தேசிய விருதை வசப்படுத்தி பொன்னியின் செல்வன் பாகம் -1 திரைப்படக்குழு அசத்தியுள்ளது.

அதன்படி, சிறந்த பின்னணி இசையமைத்த ஏ.ஆர்.ரஹ்மானும், சிறந்த ஒலி வடிவமைப்பு வழங்கிய ஆனந்த் கிருஷ்ண்மூர்த்தியும், சிறந்த ஒளிப்பதிவாளராக ரவி வர்மனும் தேசிய விருதை பெறுகின்றனர்.

ஏ.ஆர்.ரஹ்மான்:

1992-ம் ஆண்டு, தனது முதல் திரைப்படமான 'ரோஜா' மூலம் இந்திய சினிமாவின் இசைத் துறையையே புரட்டிப் போட்டவர் ஏ.ஆர்.ரஹ்மான் எனச் சொன்னால் அது மிகையாகாது. இன்று வரை தான் இசையமைக்கும் திரைப்படங்களில் ஏதேனும் ஒரு வகையான புதுமையைச் செய்து வருகிறார் அவர்.