தாய்லாந்து - கம்போடியா மோதலுக்கு முற்றுப்புள்ளி!
நீண்டகாலமாக நீடித்து வந்த எல்லைப் பிரச்சினை தொடர்பான மோதல்களை முடிவுக்கு கொண்டுவர, தாய்லாந்து மற்றும் கம்போடியா ஆகிய இரு நாடுகளும் நிபந்தனையற்ற போர் நிறுத்தத்திற்கு ஒப்புக்கொண்டுள்ளன.
மலேசியாவில் நடைபெற்ற பேச்சுவார்த்தையைத் தொடர்ந்து, மலேசிய பிரதமர் அன்வார் இப்ராஹிம் இந்த முக்கிய அறிவிப்பை இன்று வெளியிட்டார்.
மலேசிய தலைநகர் கோலாலம்பூரில் கடந்த இரு நாட்களாக நடைபெற்ற அமைதிப் பேச்சுவார்த்தையில், தாய்லாந்து பிரதமர் ஸ்ரேத்தா தவிசின் மற்றும் கம்போடிய பிரதமர் ஹுன் மாண்டேட் ஆகியோர் கலந்துகொண்டனர்.
இந்தப் பேச்சுவார்த்தைகள் மலேசியாவின் மத்தியஸ்தத்துடன் நடைபெற்றன. நீண்ட விவாதங்களுக்குப் பிறகு, இரு நாட்டுத் தலைவர்களும் தங்கள் படைகளுக்கு உடனடியாக போர் நிறுத்தம் செய்யுமாறு உத்தரவிட ஒப்புக்கொண்டனர்.
"இது ஒரு வரலாற்றுச் சிறப்புமிக்க தருணம். தாய்லாந்து மற்றும் கம்போடியாவின் தலைவர்கள் பிராந்திய அமைதி மற்றும் ஸ்திரத்தன்மைக்கு முன்னுரிமை அளித்து, தங்கள் மக்களின் நலனுக்காக ஒரு கடினமான ஆனால் அவசியமான முடிவை எடுத்துள்ளனர்," என்று பிரதமர் அன்வார் இப்ராஹிம் செய்தியாளர்கள் கூட்டத்தில் தெரிவித்தார்.
மேலும் எந்தவித முன்நிபந்தனைகளும் இன்றி, இரு தரப்பு படைகளும் உடனடியாக தங்கள் தாக்குதல்களை நிறுத்த ஒப்புக்கொண்டுள்ளன. மோதல் நடைபெற்ற எல்லைப் பகுதிகளில் இருந்து படைகளை படிப்படியாக விலக்கிக் கொள்வது குறித்து விரைவில் ஒரு செயல்திட்டம் வகுக்கப்படும்.
மேலும் போர் நிறுத்தத்தை கண்காணிக்கவும், எதிர்கால மோதல்களைத் தவிர்க்கவும் ஒரு கூட்டு கண்காணிப்புக் குழு அமைக்கப்படும். இதில் மலேசியாவைச் சேர்ந்த பிரதிநிதிகளும் இடம்பெற வாய்ப்புள்ளது. எல்லைப் பிரச்சினைகளுக்கு நிரந்தரத் தீர்வு காண்பதற்கான பேச்சுவார்த்தைகளைத் தொடரவும் இரு நாடுகளும் சம்மதித்துள்ளன. இதற்காக ஒரு புதிய பேச்சுவார்த்தை குழு அமைக்கப்படும் என தெரிவித்தார்.
இதனால் இந்த போர் நிறுத்த ஒப்பந்தம் தென்கிழக்கு ஆசிய பிராந்தியத்தில் பெரும் நிம்மதியை ஏற்படுத்தியுள்ளது. பல ஆண்டுகளாக எல்லைப் பிரச்சினைகளால் பதற்றமாக இருந்த இந்த இரு நாடுகளுக்கு இடையே அமைதியை நிலைநாட்டுவதற்கான ஒரு முக்கிய படியாய் இது கருதப்படுகிறது.
