ஆடிட்டர் குருமூர்த்தியுடன் அமித்ஷா சந்திப்பு... ஒரு மணிநேரத்திற்கு மேலாக நீடிக்கும் பேச்சுவார்த்தை!

தமிழ்நாடு சட்டப்பேரவை தேர்தலுக்கு இன்னும் ஒரு ஆண்டு காலமே உள்ள நிலையில், தேர்தல் கூட்டணி விவகாரங்கள் சூடுபிடித்துள்ளது. திமுகவிற்கு எதிராக வலுவான கூட்டணி அமைத்து, 2026 சட்டமன்ற தேர்தலை சந்திக்க பாஜக திட்டமிட்டுள்ளது. குறிப்பாக கூட்டணியில் இருந்து விலகி சென்ற அதிமுகவை மீண்டும் கூட்டணிக்குள் கொண்டுவர, பாஜக முயற்சித்து வருவதாக கூறப்படுகிறது.

கடந்த மாதம் டெல்லி சென்று அமித்ஷாவை சந்தித்த எடப்பாடி பழனிசாமி தலைமையிலான அதிமுக தலைவர்கள், பாஜக மாநில தலைவர் பதவியில் அண்ணாமலையை மாற்றுமாறு வலியுறுத்தியதாக பேசப்பட்டது. இதனால் அண்ணாமலைக்கு பதிலாக, அதிமுக பாஜக கூட்டணிக்கு வசதியாக புதிய தலைவர் நியமிக்கப்பட உள்ளதாக தகவல் வெளியானது.

மேலும், அடுத்த தலைவருக்கான போட்டியில் நான் இல்லை என்பதை அண்ணாமலையும் உறுதிப்படுத்தினார். இதற்கிடையே, மத்திய உள்துறை அமைச்சர் அமித்ஷா, தனி விமானம் மூலம் நேற்று இரவு 11 மணியளவில் சென்னை விமான நிலையம் வந்தடைந்தார். அவரை மத்திய இணை அமைச்சர் எல். முருகன், பாஜக மாநில தலைவர் அண்ணாமலை, நயினார் நாகேந்திரன், வானதி சீனிவாசன், சுதாகர் ரெட்டி, பொன். ராதாகிருஷ்ணன், கரு. நாகராஜன் உள்ளிட்டோர் வரவேற்றனர்.

தொடர்ந்து, அதித்ஷா இன்று காலை பாஜக மூத்த தலைவர் தமிழிசை சௌந்தரராஜனின் இல்லத்திற்கு சென்று அவரது தந்தை மறைவு குறித்து ஆறுதல் தெரிவித்தார். பின்னர், சென்னை மயிலாப்பூரில் உள்ள துக்ளக் ஆசிரியர் குருமூர்த்தி இல்லத்திற்கு சென்ற மத்திய உள்துறை அமைச்சர் அமித்ஷா அவருடன் ஆலோசனை நடத்தி வருகிறார். தமிழக அரசியல் வியூகம் குறித்தும், பாஜக தலைவர் தேர்வு, பாஜக கூட்டணி குறித்தும் ஆலோசனை நடத்தி வருவதாக தகவல்கள் வெளியாகியுள்ளன.

அமித்ஷா உடன் பாஜக மாநிலத் தலைவர் அண்ணாமலையும் சென்றுள்ளார். மாலையில்தான் குருமூர்த்தி வீட்டிற்கு அமித்ஷா செல்வார் என கூறப்பட்ட நிலையில் முன்கூட்டியே இந்த சந்திப்பு நடைபெற்று வருகிறது. இந்த சந்திப்பு சுமார் 1 மணி நேரத்திற்கு மேலாக நீடித்து வரும் நிலையில் அமித்ஷா பிற்பகல் 1.30 மணி அளவில் செய்தியாளர்களை சந்திக்க உள்ளார்.