பொங்கலை முன்னிட்டு வெளியான அஜித்தின் விடாமுயற்சி அப்டேட்...! - ரசிகர்கள் கொண்டாட்டம்..!

அஜித் குமார் நடிப்பில் உருவாகும் விடாமுயற்சி, திரைக்கு வந்த பிறகு நெட்ஃப்லிக்ஸ் ஓடிடி தளத்தில் வெளியாகும் என படக்குழு அறிவித்துள்ளது.

அஜித்தின் நடிப்பில் மகிழ் திருமேனியின் இயக்கத்தில் விடாமுயற்சி திரைப்படம் உருவாகி வருகின்றது. கடந்த மே மாதம் அஜித்தின் பிறந்தநாளை முன்னிட்டு விடாமுயற்சி படத்தின் அதிகாரபூர்வ அறிவிப்பு வெளியானது. ஆனால் அதன் பின் படத்தை பற்றி எந்த ஒரு தகவலும் இல்லை. இடையில் இப்படம் கைவிடப்பட இருப்பதாகவும் வதந்திகள் பரவின. ஆனால் ஒருவழியாக விடாமுயற்சி படத்தின் படப்பிடிப்பு அஜர்பைஜானில் கடந்த அக்டோபர் மாதம் துவங்கப்பட்டதை தொடர்ந்து விறுவிறுப்பாக நடைபெற்று வருகின்றது.

இப்படத்தில் அஜித்துடன் இணைந்து த்ரிஷா, அர்ஜுன், ஆரவ் என பலர் நடித்து வருகின்றனர். அஜித் மற்றும் த்ரிஷா விடாமுயற்சி படத்தில் கணவன் மனைவியாக நடிப்பதாகவும், அர்ஜுன் மற்றும் ஆரவ் இப்படத்தில் வில்லனாக நடிப்பதாகவும் தகவல் வந்துள்ளது. மேலும் இப்படத்தில் அஜித்தின் கதாபாத்திரத்தின் பெயர் அர்ஜுன் என்றும், த்ரிஷாவின் பெயர் கயல் என்றும் தகவல் கிடைத்துள்ளது.

இதெல்லாம் ஒருபக்கம் இருக்க இப்படத்தின் படப்பிடிப்பை விறுவிறுப்பாக நடத்தி முடித்துவிட்டு இந்தாண்டு மே மாதம் ஒன்றாம் தேதி அஜித்தின் பிறந்தநாளை முன்னிட்டு படத்தை வெளியிட படக்குழு திட்டமிட்டுள்ளது. இந்நிலையில் கடைசியாக விடாமுயற்சி படத்திலிருந்து அதிகாரபூர்வமான அறிவிப்பு வந்து பல நாட்கள் ஆகிவிட்டது. புத்தாண்டை முன்னிட்டு இப்படத்தின் போஸ்டர் அல்லது ஏதேனும் அறிவிப்பு வெளியாகும் என அஜித் ரசிகர்கள் ஆவலாக காத்திருந்தனர்.

ஆனால் கடைசியில் அவர்களுக்கு ஏமாற்றம் தான் மிஞ்சியது. இதைத்தொடர்ந்து தற்போது பொங்கல் பண்டிகையை முன்னிட்டாவது விடாமுயற்சி படத்திலிருந்து ஏதேனும் அறிவிப்பு வெளியாகுமா என அஜித்தின் ரசிகர்கள் ஏக்கத்துடன் எதிர்பார்த்து இருக்கின்றனர். இந்நிலையில் விடாமுயற்சி படப்பிடிப்பு தளத்திலிருந்து அவ்வப்போது புகைப்படங்களும் வீடியோக்களும் வெளியான வண்ணம் இருக்கின்றன.

அஜித் ரசிகர்களிடம் உரையாடுவது, த்ரிஷா, அர்ஜுன் ஆகியோரை அஜித் படமெடுப்பது என பல விஷயங்கள் நடைபெற்று வருகின்றது.. வையெல்லாம் இணையத்தில் வெளியாகி அஜித் ரசிகர்களை குஷியில் ஆழ்த்தி வருகின்றது. என்னதான் இதுபோன்ற புகைப்படங்களும் வீடியோக்களும் வெளியானாலும் அதிகாரபூர்வமாக ஒரு போஸ்டரோ அல்லது முதல் பாடல் பற்றிய அறிவிப்போ வெளியானால் நன்றாக இருக்குமே என்பது தான் அஜித் ரசிகர்களின் விருப்பமாக உள்ளது.

அவர்களின் விருப்பத்தை நிறைவேற்றும் வகையில், படத்தின் ஓடிடி ஆப்டேட் வெளியாகியுள்ளது. அதன்படி விடாமுயற்சி படம் திரைக்கு வந்த பிறகு நெட்ஃப்லிக்ஸ் ஓடிடி தளத்தில் வெளியாகும் என படக்குழு அறிவித்துள்ளது. மேலும் தமிழ், மலையாளம், தெலுங்கு, கன்னடம் ஆகிய மொழிகளில் வெளியாகவுள்ளதாகவும் தகவல் வெளியாகியுள்ளது.