சர்ச்சைப் பேச்சு விவகாரம் - நடிகை கஸ்தூரிக்கு ஜாமின் | நீதிமன்றம் உத்தரவு!

தெலுங்கு மக்கள் குறித்து சர்ச்சைக்குறிய வகையில் கருத்து தெரிவித்த வழக்கில் கைது செய்யப்பட்டுள்ள நடிகை கஸ்தூரிக்கு ஜாமின் வழங்கி நீதிமன்றம் உத்தரவிட்டுள்ளது.

நடிகை கஸ்தூரி சமீபத்தில் தெலுங்கு பேசும் மக்கள் குறித்து அவதூறாக பேசியது பெரும் சர்ச்சையாக மாறியது. இது தொடர்பாக அவர் மீது காவல் நிலையத்தில் புகார் கொடுக்கப்பட்ட நிலையில் போலீசார் வழக்கு பதிவு செய்து சம்மன் கொடுக்க சென்றபோது அவர் தலைமறைவானார்.

பின்னர் அவர் உயர்நீதிமன்ற மதுரை கிளையில் முன்ஜாமின் கேட்டு மனு தாக்கல் செய்த நிலையில் தெலுங்கு பேசும் மக்கள் தமிழ்நாட்டைச் சேர்ந்தவர்கள்தான் என்று கூறிய நீதிபதி தெலுங்கர்கள் குறித்து கஸ்தூரி அவதூறாக பேசியதை ஏற்க முடியாது என்றார். மேலும் அவருக்கு முன் ஜாமீன் வழங்க மறுப்பு தெரிவித்தது உத்தரவிட்டார்.

இதைத்தொடர்ந்து நடிகை கஸ்தூரியை பிடிக்க இரண்டு தனிப்படையை போலீசார் அமைத்த நிலையில் கடந்த 17ம் தேதி அவரை ஹைதராபாத்தில் அதிரடியாக கைது செய்து அவரை சென்னைக்கு அழைத்து வந்தனர். பின்னர், எழும்பூர் நீதிமன்றத்தில் ஆஜர்படுத்திப்பட்ட நடிகை கஸ்தூரி புழல் சிறையில் அடைக்கப்பட்டார்.

இதையும் படியுங்கள் : தஞ்சாவூரில் ஆசிரியை குத்திக் கொலை – குற்றவாளி கைது!

இந்த நிலையில் தனக்கு ஜாமின் வழங்கக்கோரி நடிகை கஸ்தூரி சென்னை எழும்பூர் நீதிமன்றத்தில் மனு அளித்துள்ளார். அதில், தனது குழந்தைகளை பராமரிக்க ஆள் இல்லை எனவும் தனக்கு ஜாமின் வழங்க வேண்டும் எனவும் கோரிக்கை விடுத்துள்ளார்.

இதையடுத்து இந்த மனுவை விசாரிக்கும் காவல்துறை சார்பில் ஆட்சேபனை இல்லை என தெரிவித்ததால் கஸ்தூரிக்கு ஜாமின் வழங்கி சென்னை எழும்பூர் நீதிமன்றம் உத்தரவிட்டுள்ளது.