13 சட்டமன்ற தொகுதி இடைத்தேர்தல் முடிவுகள்: ம.பி.யை தவிர மற்ற தொகுதிகளில் எதிர்கட்சிகள் முன்னிலை!

விக்கிரவாண்டி தொகுதி உட்பட நாடு முழுவதும் நடைபெற்ற 13 சட்டமன்ற தொகுதிகளில் பதிவான வாக்குகள் இன்று எண்ணப்படுகின்றன. இதில் மத்திய பிரதேசம் அமர்வாரா தொகுதியை தவிர மற்ற தொகுதிகளில் எதிர்கட்சிகள் முன்னிலை வகிக்கின்றன.

நாடு முழுவதும் 7 மாநிலங்களில் உள்ள 13 சட்டமன்ற தொகுதிகளுக்கு கடந்த ஜூலை 10-ம் தேதி இடைத்தேர்தல் நடைபெற்றது. அதன்படி, மேற்கு வங்காளத்தில் உள்ள ராய்கஞ்ச், ரனாகாட் தக்சின், பாக்தா மற்றும் மணிக்தலா ஆகிய 4 தொகுதிகள், மத்திய பிரதேசத்தில் அமர்வாரா, பீகாரில் ரூபாலி, உத்தரகாண்டில் உள்ள பத்ரிநாத் மற்றும் மங்களூர், பஞ்சாப்பில் ஜலந்தர் மேற்கு, இமாசல பிரதேசத்தில் டேஹ்ரா, ஹமிர்பூர் மற்றும் நலகர் ஆகிய தொகுதிகளுக்கும் இடைத்தேர்தல் நடைபெற்றது.

இதேபோல், தமிழ்நாட்டில் விழுப்புரம் மாவட்டம் விக்கிரவாண்டி திமுக சட்டமன்ற தொகுதி உறுப்பினராக இருந்த புகழேந்தி கடந்த ஏப்ரல் மாதம் மரணம் அடைந்ததையடுத்து, விக்கிரவாண்டி தொகுதிக்கு இடைத்தேர்தல் நடைபெற்றது. இடைத்தேர்தல் நடைபெற்ற 13 தொகுதிகளிலும் இன்று (ஜூலை 13) வாக்குகள் எண்ணப்பட்டு முடிவுகள் அறிவிக்கப்படுவதாக தெரிவிக்கப்பட்டது.

அதன்படி, இன்று காலை 8 மணிக்கு வாக்கு எண்ணிக்கை தொடங்கியது. விறுவிறுப்பாக நடைபெற்று வரும் இந்த வாக்கு எண்ணிக்கையில் பஞ்சாப்பில் உள்ள ஜலந்தர் மேற்கு தொகுதியில் இந்தியா கூட்டணியில் உள்ள காங்கிரஸ் மற்றும் ஆம் ஆத்மி இடையே பிரதான போட்டி நிலவுகிறது. இதில், ஒரு தொகுதியில் ஆம் ஆத்மி முன்னிலையில் உள்ளது. மற்ற 12 தொகுதிகளிலும் தேசிய ஜனநாயக கூட்டணி - இந்தியா கூட்டணி கட்சிகள் இடையே போட்டி நிலவி வருகிறது.

காலை 10.30 மணி நிலவரம் - திமுக வேட்பாளர் அன்னியூர் சிவா முன்னிலைhttps://t.co/CnV8a4gCkW | #ResultsWithNews7Tamil | #Tamilnadu | #Villupuram | #Vikravandi | #VikravandiElection | #VikravandiByeElection | #Electionresult | #ElectionResults | #DMK | #MKStalin | #PMK |… pic.twitter.com/b9lowEtQql

— News7 Tamil (@news7tamil) July 13, 2024

மத்திய பிரதேசத்தில் அமர்வாரா தொகுதியில் பாஜக முன்னிலையில் உள்ளது. மற்ற அனைத்து தொகுதிகளிலும் எதிர்கட்சிகள் முன்னிலையில் இருந்து வருகின்றன. அதேபோல், தமிழ்நாட்டில் விக்கிரவாண்டி தொகுதியில் இந்தியா கூட்டணியில் அங்கம் வகிக்கும் திமுக சுமார் 15346 வாக்குகள் வித்தியாசத்தில் முன்னிலையில் உள்ளது.