கங்குவாவுடன் வெளியாகும் #VaaVaathiyar டீசர்?

கார்த்தி நடிப்பில் உருவாகி உள்ள வா வாத்தியார் படத்தின் டீசர் வரும் நவ.14 ஆம் தேதி வெளியிட படக்குழு திட்டமிட்டுள்ளதாக தகவல் வெளியாகி உள்ளது.

தமிழ் சினிமாவில் முன்னணி நடிகர்களுள் ஒருவராக வலம் வருபவர் நடிகர் கார்த்திக். இவரது நடிப்பில் கடந்த செப்.27ஆம் தேதி வெளியான மெய்யழகள் மக்களிடையே நல்ல வரவேற்பை பெற்றுள்ளது. இதனிடையே இவரின் 26வது படத்தை நலன் குமாரசாமி இயக்கியுள்ளார். சூது கவ்வும், காதலும் கடந்து போகும் போன்ற வெற்றி படங்களை நலன் குமாரசாமி இயக்கியுள்ளார். இப்படத்தை ஸ்டுடியோ கிரீன் ஞானவேல் ராஜா தயாரித்துள்ளார்.

இப்படத்தில் நடிகர் கார்த்திக்கு ஜோடியாக கிரித்தி ஷெட்டி நடித்துள்ளார். மேலும் இப்படத்தில் ராஜ்கிரண், சத்யராஜ் ஆகியோர் முக்கிய கதாபாத்திரத்தில் நடித்துள்ளனர். வா வாத்தியார் என பெயரிடப்பட்டுள்ள இப்படத்திற்கு, சந்தோஷ் நாராயணன் இசையமைத்திருக்கிறார்.  கிறிஸ்துமஸ்க்கு இப்படத்தை வெளியிட முடிவு செய்ததாக கூறப்பட்ட நிலையில், வரும் பொங்கலுக்கு படம் திரைக்கு வரும் என கூறப்படுகிறது.

இந்நிலையில் இப்படத்தின் டீசரை வரும் 14ஆம் தேதி வெளியிட படக்குழு முடிவு செய்துள்ளதாக தகவல் வெளியாகி உள்ளது. கங்குவா வெளியாக உள்ள திரையரங்குகளில் டீசர் வெளியிடப்பட உள்ளதாகவும் கூறப்படுகிறது.