இந்த வாரம் வெளியான படங்களில் எது பெஸ்ட்… எந்த படம் பார்க்கலாம்?

தமிழகத்தில் டிட்வா புயல் காரணமாக பல இடங்களில் மழை பெய்து வருகிறது. புயல் முன்னெச்சரிக்கை நடவடிக்கைகள் தீவிரமடைந்துள்ளன. இந்நிலையில் தமிழில் இந்த வாரம் வெளியான படங்களின் மினி ரிவியூவை இங்கு பார்க்கலாம்.

தேரே இஸ்க் மே:

ஆனந்த் எல்.ராய் இயக்கத்தில் தனுஷ், கிர்த்திசனோன், பிரகாஷ்ராஜ், டோட்டாராய்சவுத்ரி நடித்த இந்தி படம். ஆனாலும், தமிழில் டப்பாகி உள்ளது. இந்திய விமானப்படையில் பைலட் ஆகும் தனுஷ் மீது ஒரு விசாரணை நடவடிக்கையை உயர் அதிகாரி கொண்டு வருகிறார். அவரை மனரீதியாக பரிசோதித்து அவர் பிட்டாக இருக்கிறார் என்று சர்ட்டிபிகேட் கொடுக்க வேண்டிய பொறுப்பு டில்லியில் இருக்கும் கிர்த்திசனோனுக்கு செல்கிறது. தனுஷ் போட்டோவை பார்த்தவுடன் ஹீரோயினுக்கு அதிர்ச்சி. காரணம், தனுஷ் அவரின் காதலராக இருந்தவர். இப்போது கர்ப்பிணியாக, குடிகாரியாக இருக்கும் கிர்த்தி உடனடியாக தனுசை பார்க்க காஷ்மீர் புறப்படுகிறார். அங்கே என்ன நடக்கிறது. தனுஷ், கிர்த்தி காதல் முறிந்தது ஏன். இருவரும் மீண்டும் இணைந்தார்களா இதுதான் தேரே இஸ்க் மே கதை. உன் அன்பில் என தலைப்புக்கு அர்த்தம்.

பைலட், அடிதடி மாணவன் என இரண்டுவிதமான நடிப்பில் தனுஷ் பின்னி எடுத்து இருக்கிறார். அவரின் காதல் காட்சிகள், காதல் பெயிலியர் நேரங்கள், அப்பாவை இழந்து காசியில் தவிக்கும் சீன்கள், மீண்டும் காதலியை பார்த்தவுடன் தவிக்கும் நிமிடங்கள், கிளைமாக்ஸ் உட்பட பல இடங்களில் நடிப்பில் மிரட்டியிருக்கிறார். அவரை விட சில சீன்களில் உருக்கமான நடிப்பால் ஸ்கோர் செய்து இருக்கிறார் கிர்த்திசனோன். அவர் அப்பாவாக வரும் டோட்டாராய் சவுத்ரியும், தனுஷ் அப்பாவாக வரும் பிரகாஷ்ராஜூம் தங்கள் பங்கிற்கு சிறப்பான நடிப்பை தந்து இருக்கிறார்கள்.

டில்லி, காஷ்மீர், காசியில் நடக்கும் கதை, காதல் போர்ஷன், கிளைமாக்சுக்கு முந்தைய அரைமணி நேர உருக்கமான சீன்கள் படத்துக்கு பலம். இதற்குமுன்பு தனுசை வைத்து ராஞ்சனா என்ற இந்தி படத்தை இயக்கியவர் ஆனந்த்.எல்.ராய். அந்தளவுக்கு இந்த படம் இல்லை என்றாலும், ஒரு வித்தியாசமான காதலை சொல்கிறது. காரணம், காதல் முறிவுக்குபின் திருமணமாகி, வயிற்றில் குழந்தையுடன், குடிக்கு அடிமையான ஹீரோயின், தனது காதலனை தேடி செல்கிறார். அவர் நினைப்பது என்ன? அதை தனுஷ் நிறைவேற்றினாரா என படம் முடிகிறது. ஏ.ஆர்.ரகுமான் இசை, பாடல்கள் படத்தை இன்னும் அழகாக்குகிறது. படத்தின் நீளம், காதலின் இன்னொரு பார்வை, புதுவிதமான கிளைமாக்ஸ் இதை ஏற்றுக்கொண்டால் படம் ரசிக்கலாம்.

ரிவால்வர் ரீட்டா:

ஜே.கே. சந்துரு இயக்கத்தில் கீர்த்திசுரேஷ், ராதிகாசரத்குமார், சுனில், ஜான்விஜய், சுரேஷ்சக்ரவர்த்தி நடித்த பிளாக் காமெடி கதை. கீர்த்திசுரேஷ் வீட்டில் தவறுதலாக என்ட்ரி ஆகும் பிரபல தாதா சூப்பர் சுப்புராயன் சூழ்நிலை காரணமாக செத்துவிடுகிறார். அவர் பாடியை அப்புறப்படுத்த கீர்த்திசுரேஷ், அவர் அம்மா ராதிகா, சகோதரிகள் திட்டம் போடுகிறார்கள். தாதா மகனான சுனில் அப்பாவை தேடுகிறான். இன்னொரு குரூப் அந்த தாதா பாடியை வைத்து 5 கோடி சம்பாதிக்க நினைக்கிறது.

போலீஸ் ஜான் விஜய் இடையில் வந்து ரவுசு பண்ணுகிறார். கீர்த்திசுரேசின் திட்டம் வொர்க் அவுட் ஆனதா? கடைசியில் அவர் ரிவால்வர் எடுத்து என்ன செய்கிறார் என்பது கதை. கீர்த்திசுரேஷ் நடிப்பு, ராதிகா அப்பாவிதனம் ஓகே. ஆனால், காமெடி பெரிதாக செட் ஆகவில்லை. கடைசி சில நிமிடங்கள் மட்டும் கீர்த்தி கைதட்டல் வாங்குகிறார். ஒரு அப்பாவி குடும்பம், தாதாக்கள் துரத்தல், போலீஸ் விசாரணை என படம் செல்கிறது.

பிபி180:

ஜேபி இயக்கத்தில் மறைந்த டேனியல்பாலாஜி மற்றும் தன்யா ரவிச்சந்திரன், அருள்தாஸ், கே.பாக்யராஜ் உட்பட பலர் நடித்த படம். பிரபல தாதாவான டேனியல்பாலாஜி்க்கும், அரசு மருத்துவமனை டாக்டராக தன்யா ரவிச்சந்திரனுக்குமான ஈகோ மோதலே படத்தின் கரு. விபத்தில் இறந்த பாக்யராஜ் மகள் உடலை போஸ்ட் மார்டம் பண்ணக்ககூடாது என்று மிரட்டுகிறார் டேனியல் பாலாஜி, நான் கடமையை செய்வேன் என்கிறார் தன்யா. அடுத்து என்ன நடக்கிறது. அவமானப்படும் டேனியல் பாலாஜி தன்யாவை, போலீஸ் கமிஷனர் தமிழை பழிவாங்க என்ன செய்கிறார். பதிலுக்கு தன்யா எப்படி பதிலடி கொடுக்கிறார் என்பதை விறுவிறு திரைக்கதையாக எடுத்து இருக்கிறார்கள்.

டேனியல்பாலாஜி நடிப்பு, தன்யாவின் செயல்பாடுகள், சேசிங், போலீஸ் நிலைப்பாடு என படத்தில் ஏகப்பட்ட பிளஸ். குறிப்பாக, கிளைமாக்ஸ் எத்தனை ஆண்டுகள் ஆனாலும் நம்மால் மறக்க முடியாது. கோபக்கார ஆண்களுக்கு, பழிவாங்க துடிக்கும் தாதாக்களுக்கு அது ஒரு பாடம். மிஷ்கின் உதவியாளராக இருந்தவர் இயக்குனர் ஜேபி. அஞ்சாதே படத்தில் மொட்டையனாக நடித்தவர். இந்த ஆண்டு வெளியான தரமான படங்களில் ஒன்றாக பிபி180ஐ இயக்கி இருக்கிறார். பிபி, அதாவது ரத்தக்கொதிப்பு 180க்கு மேல் அதிகமானால் மனநிலை எப்படி மாறும் என்பதால் இந்த தலைப்பு. மறைந்த டேனியல் பாலாஜியின் நடிப்பை பாராட்டிக் கொண்டே இருக்கலாம். இந்த வார படங்களின் விமர்சன ரீதியாக பிபி180தான் டாப்.

ஒண்டிமுனியும், நல்லபாடனும்:

சுகவனம் இயக்கத்தில் கொங்கு பின்னணியில் நடக்கும் கிராமத்து மக்களின் வாழ்வியலை சொல்லும் நல்ல பதிவு. கிணற்றில் விழுந்த தனது மகன் பிழைக்க வேண்டும் என்பதற்காக, ஒரு கிடாயை தனது குல தெய்வம் ஒண்டிமுனிக்கு நேர்த்திகடன் ஆக்குகிறார் ஏழை தொழிலாளியான பரோட்டா முருகேசன். (சூரி பரோட்டா காமெடியில் சப்ளையர் ஆக நடித்தவர்) ஆனால், இரண்டு பண்ணையார்களின் ஈகோ பிரச்னை காரணமாக திருவிழா நடத்த முடியாமல், அந்த கிடாயை முனிக்கு அறுக்க முடியாமல் அவர் தவிக்கிறார்.

அந்த கிடாயை பணத்துக்காக மகன், மருமகன் ஆட்டையை போட நினைக்க, கடைசியில் என்ன நடக்கிறது. திருவிழா நடந்ததா? கிடாய் பலி ஆனதா என்பது கதை. கதைக்களம், கொங்குவட்டார வழக்கு, முருகேசன் உள்ளிட்டோர் நடிப்பு, கிளைமாக்ஸ், படம் சொல்லும் கருத்து ஆகியவற்றிற்கு இந்த படம் பல விருதுகளை பெறும். கொங்கு பகுதி கிராமங்களின் நிலையை, விவசாய தொழிலாளிகளின் வாழ்வியலை, ஒரு நல்ல மனிதனின் வாழ்க்கை, பிரச்னைகளை அழுத்தமாக சொல்லியிருக்கிறார் இயக்குனர். இந்த ஆண்டு வந்த படங்களில் தரமான கிராமத்து படைப்பு.

வெள்ளகுதிர:

தனது மனைவி, மகனுடன் சூழ்நிலை காரணமாக, மலை கிராமத்தில் வசிக்க செல்கிறார் ஹீரோ ஹரிஷ் ஓரி. அங்கே அவரின் புத்தி தடுமாறுகிறது மூலிகை ரசம் காய்ச்சுகிறார். மலைவாழ் மக்களை அப்புறப்படுத்தி அவர்களின் நிலங்களை தன் பெயருக்கு மாற்றுகிறார் வில்லன் உதிரி விஜயகுமார். அதை பெண் ஊராட்சி தலைவரான மெலோடி எதிர்க்கிறார். மக்களுக்கு ஆதரவாக ஹீரோ மனைவி அபிராமிபோஸ் குரல் கொடுக்கிறார். மலை கிராமத்தில் மாற்றங்கள் வந்ததா?

அவர்களுக்கு சாலை வசதி கிடைத்ததா? ஹீரோ திருந்தினாரா என்பதை மலைகிராமங்களின் மனசாட்சி பதிவாக இயக்கி இருக்கிறார் சரண்ராஜ் செந்தில்குமார். படத்தில் நடித்தவர்கள் பலர் கூத்துபட்டறை, புனே திரைப்பட கல்லுாரி, டில்லி நாடக பள்ளியை சேர்ந்தவர்கள், தவிர அந்த நிஜ மலைவாழ் மக்களும் நடித்து இருக்கிறார்கள். ஆகவே, படமும், நடிப்பும் நேர்த்தி. சினிமாவை தாண்டி ஒரு நல்ல படைப்பாக, நல்ல பதிவாக மாறியிருக்கிறது வெள்ளகுதிர.

ஐபிஎல்:

டிடிஎப் வாசன், கிஷோர், அபிராமி நடிக்க, கருணாநிதி இயக்கிய படம். ஒரு லாக்அப் மரணத்தை மறைக்க, அப்பாவி கால்டாக்சி டிரைவர் கிஷோர் மீது பழிபோடுகிறார் கெட்ட போலீஸ் இன்ஸ்பெக்டர் போஸ் வெங்கட். கிஷோர் தங்கை காதலரான டிடிஎப் வாசன் உண்மை அறிந்து ஆதாரங்களை திரட்டி அவரை வெளியில் கொண்டு வருகிறார். இதுதான் ஐபிஎல் கதை. பல லாக்அப் மரணங்களின் வலியை, போலீஸ், அரசியல்வாதிகளின் மறுபக்கத்தை கதை விவரிக்கிறது.

இது தவிர, சில சர்ச்சைக்குள்ளான அரசியல் நிகழ்வுகளை மறைமுகமாக சொல்கிறது. போலீஸ் அடியில் தவிப்பவராக, குடும்பத்தை நினைத்து பதறுபவராக கிஷோர் நடிப்பு சிறப்பு. டிடிஎப் வாசனுக்கு முதல் படம், இன்னும் நடிக்க கற்றுக்கொள்ள வேண்டும். காதல்காட்சி, டான்ஸ், ஒரு பைக் ரேசில் சிறப்பாக செயல்பட்டு இருக்கிறார். ஒரு வீடியோ ரகசியம், லாக்அப் மரணம், விசாரணை, அரசியல் விளையாட்டு, போலீஸ் டார்ச்சர் என சுற்றினாலும் படம் சுமார்.

ப்ரைடே:

ஹரி வெங்கடேஷ் இயக்கத்தில் கன்யாகுமரி பேக்ரவுண்டில் நடக்கும் ஆக்சன் படம். எம்எல்ஏ ஆக நினைக்கும் மைம்கோபியிடம் அடியாளாக இருக்கிறார் ஹீரோ அனிஷ்மாசிலாமணி. அப்போது அவர் தம்பி கொல்லப்படுகிறார். அவரை கொல்ல நினைக்கிறார் கேபிஒய் தீனா. அவ்வப்போது ஒரு சில குழுக்கள் மோதிக்கொண்டே இருக்கிறார்கள். சிலர் கொல்லப்படுகிறார்கள். இந்த சண்டை நின்றதா? ஹீரோ தம்பி கொல்லப்பட்டது ஏன்? தீனாவின் கோபம் எதற்காக?

ஹீரோ நிலை என்னவானது என்பது ப்ரைடே கதை. வெள்ளிக்கிழமையில் சம்பவங்கள் நடப்பதால் இந்த தலைப்பு. கன்யாகுமரி பின்னணி, தாதாக்களின் கோபம், பழிவாங்கல், சில ஆக் சன் சீன்கள் மனதில் நிற்கிறது. ஹீரோவின் உடல்மொழி, அந்த வட்டார பேச்சு, ஆக்சன் காட்சிகள் அருமை. தீனா, ராம்ஸ் கேரக்டரும் சிறப்பு. போலீஸ் இன்ஸ்பெக்டராக வரும் சித்துகுமரேசன் நடிப்பு கச்சிதம். ரவுடிகளின் வாழ்க்கை, மனப்போராட்டம், சண்டைகள் என அவர்கள் உலகை ஆழமாக பதிவு செய்து இருக்கிறார்கள்.

அஞ்சான், அட்டகாசம்:

லிங்குசாமி இயக்கத்தில் சூர்யா நடித்த அஞ்சான் படம் புதுப்பொலிவுடன் 11 ஆண்டுகளுக்குபின் ரீ ரிலீஸ் ஆகியிருக்கிறது. 30 நிமிட காட்சிகள் நீக்கப்பட்டதால் படம் விறுவிறுப்பாக இருக்கிறது. சூரி காமெடி படத்தில் இல்லை. எடிட்டிங்கில் கொஞ்சம் மாறுதல், சூர்யா நடிப்பு, சமந்தா டான்ஸ், வித்யாசாகர் இசைக்காக அஞ்சான் பார்க்கலாம்.

சரண் இயக்கத்தில் அஜித், பூஜா நடித்த அட்டகாசம் படம் 20 ஆண்டுகளுக்குபின் ரீ ரிலீஸ் ஆகியுள்ளது. அஜித் ரசிகர்களுக்கு படம் கொண்டாட்டமாக இருக்கும். இந்த படங்கள் தவிர, கே.பி.தனசேகர் இயக்கத்தில் பூங்கா பின்னணியில் உருவான பூங்கா, ரஜினிகிஷன், மொட்டை ராஜேந்திரன் நடிப்பில், ரமேஷ்பாரதி இயக்கத்தில் உருவான ,காமெடி கலந்த பேய்கதையான ரஜினிகேங், வால்ட்டிஸ்னியின் அனிமேஷன் படமான ஜூடோபியா ஆகிய படங்களும் ரிலீஸ் இந்த வாரம் ரிலீஸ் ஆகி உள்ளன.

சிறப்பு செய்தியாளர் : மீனாட்சி சுந்தரம்