37 தொகுதிகளில் வெற்றி - நாட்டின் 3வது பெரிய கட்சியாக உருவெடுத்த சமாஜ்வாதி கட்சி!

37 தொகுதிகளில் வெற்றி பெற்றதன் மூலம் நாட்டின் 3வது பெரிய கட்சியாக  சமாஜ்வாதி கட்சி உருவெடுத்துள்ளது.

நாடு முழுவதும் 7 கட்டங்களாக நடத்தப்பட்ட மக்களவை தேர்தலில் பதிவான வாக்குகள் நேற்று (ஜூன் 4) காலை 8 மணி முதல் எண்ணப்பட்டன. இத்தேர்தலில் பாஜக தலைமையிலான தேசிய ஜனநாயக கூட்டணிக்கும், காங்கிரஸ், திமுக, சமாஜ்வாதி உள்ளிட்ட எதிர்க்கட்சிகள் அங்கம் வகிக்கும் இந்தியா கூட்டணிக்கும் இடையே நேரடி போட்டி நிலவியது. 

தமிழ்நாட்டில் மொத்தம் உள்ள 39 தொகுதிகளில் பாஜக ஒரு தொகுதியில் கூட முன்னிலை பெறவில்லை. அதே நேரம் அதன் கூட்டணி கட்சியான பாமக தருமபுரி தொகுதியில் முன்னிலையில் இருந்தது. ஆனால் இறுதியில் அந்த தொகுதியில் திமுக வேட்பாளர் மணி 21300 வாக்குகள் வித்தியாசத்தில் வெற்றி பெற்றார். எனவே, தமிழ்நாடு மற்றும் புதுச்சேரி உள்ள 40 தொகுதிகளிலும் ஆளும் திமுக மற்றும் அதன் கூட்டணி கட்சிகளான காங்கிரஸ், விடுதலை சிறுத்தைகள், மதிமுக, இந்திய கம்யூனிஸ்ட், மார்க்சிஸ்ட் கம்யூனிஸ்ட், இந்திய யூனியன் முஸ்லீம் லீக் ஆகிய கட்சிகள் வெற்றி வாகை சூடியுள்ளன. 

மத்தியில் பெரும்பான்மையை நிருபித்து ஆட்சி அமைக்க 272 தொகுதிகளில் வெற்றி பெற்றிருக்க வேண்டும். இதில், தேசிய ஜனநாயகக் கூட்டணி 543 தொகுதிகளில், 292 தொகுதிகளில் வெற்றிபெற்றுள்ளது. இதில் பாஜக 239 தொகுதிகளில் வெற்றி பெற்றுள்ளது. அதேபோல், இந்தியா கூட்டணி 234 தொகுதிகளிலும் அவற்றில் சமாஜ்வாதி கட்சி 37 தொகுதிகளிலும் வெற்றி பெற்றன. 

இதன்படி, எந்த கட்சிக்கும் இதுவரை தனிப்பெரும்பான்மை கிடைக்காததால் தொடர் இழுபறி நீடித்து வருகிறது. இதனால் கூட்டணி கட்சிகள் இடம் மாறுமா? ஆட்சி அமைக்கப்போவது பாஜகவா அல்லது காங்கிரஸா? என்ற கேள்வி அனைவரிடமும் தலை தூக்கியுள்ளது.

இந்த நிலையில் மக்களவை தேர்தலில் அகிலேஷ் யாதவின் சமாஜ்வாதி கட்சி 37 இடங்களில் வெற்றிபெற்றது.  இதன் மூலம் பாஜக ,  காங்கிரஸ் கட்சிக்கு அடுத்தபடியாக சமாஜ்வாதி கட்சி 3வது இடத்தில் உள்ளன. பாஜகவின் கோட்டையாக கருதப்பட்ட உத்தரப்பிரதேசத்தில் அதிக இடங்களை வென்றதன் மூலம், சமாஜ்வாதி கட்சி அகில இந்திய அளவில் கவனம் பெற்றுள்ளது.