தவெக மாநாட்டிற்கு நிலம் வழங்கிய விவசாயிகளை கவுரவிக்க திட்டம் - விஜய் தலைமையில் விருந்தளிக்க ஏற்பாடு!

தமிழக வெற்றிக் கழகத்தின் முதல் மாநாட்டிற்கு நிலங்கள் வழங்கிய விவசாயிகளுக்கு விருந்து அளித்து கவுரவிக்கும் நிகழ்வு நாளை நடைபெறுகிறது.

தமிழ் திரையுலகின் முன்னணி நடிகரான விஜய், தமிழக வெற்றிக் கழகம் என்ற கட்சியை அண்மையில் தொடங்கினார். இதனையடுத்து தமிழக வெற்றிக் கழகத்தின் முதல் அரசியல் மாநாடு விழுப்புரம் மாவட்டம் விக்கிரவாண்டியில் கடந்த அக்.27-ம் தேதி பிரமாண்டமாக நடைபெற்றது. இந்த மாநாட்டில் லட்சக்கணக்கான தொண்டர்கள் பங்கேற்றனர்.

இதையும் படியுங்கள் : “பயத்திலிருந்து வரக்கூடிய கருத்துக்கள்” – முன்னாள் அமைச்சர் ஜெயக்குமாரின் கருத்துக்கு கனிமொழி எம்.பி பதில்!

மாநாட்டில் தவெக தலைவர் விஜய்யின் பரபரப்பான பேச்சு தமிழக அரசியல் வட்டாரத்தில் பெரும் அதிர்வலையை ஏற்படுத்தியது. மாநாட்டை தொடர்ந்து 2026-ம் ஆண்டு சட்டமன்ற தேர்தலை எதிர்கொள்ள தமிழக வெற்றிக் கழகம் தயாராகி வருகிறது. அதற்கேற்ப அரசியல் வியூகங்களை விஜய் அமைத்து வருகிறார். இதற்கிடையே தமிழக வெற்றிக் கழக மாநாட்டிற்கு நிலங்கள் வழங்கிய விவசாயிகளுக்கு தவெக சார்பில் நாளை (நவ.23) விருந்தளிக்கப்பட உள்ளது.

சென்னை பனையூரில் உள்ள தலைமை அலுவலகத்தில் அக்கட்சியின் பொதுச் செயலாளர் புஸ்ஸி ஆனந்த் தலைமையில் நாளை காலை 10 மணியளவில் இந்நிகழ்வு நடைபெறுகிறது. இந்த நிகழ்ச்சியில் தவெக தலைவர் விஜய் கலந்துக்கொள்ள உள்ளதாக தகவல் வெளியாகியுள்ளது. மேலும், இதில் விழுப்புரம் மாவட்ட நிர்வாகிகளும் பங்கேற்பதாகவும் கூறப்படுகிறது.