"ஸ்டேஷன்ல ஆள் இல்லை .. பாதுகாப்பு வேணும்னா நீங்களே ஸ்டேஷன் வந்துடுங்க.." - போலீசாரின் அலட்சியத்தால் நியூஸ் 7 தமிழ் செய்தியாளர் மீது கொலைவெறி தாக்குதல்
"ஸ்டேஷன்ல ஆள் இல்லை .. பாதுகாப்பு வேணும்னா நீங்களே ஸ்டேஷன் வந்துடுங்க.." - போலீசாரின் அலட்சியத்தால் நியூஸ் 7 தமிழ் செய்தியாளர் மீது கொலைவெறி தாக்குதல் நடத்தப்பட்டுள்ளது.
"குடித்து விட்டு நடுரோட்டில் தகராறு செய்ததை செய்தியாக வெளியிட்டால் கொன்று விடுவேன்" என நியூஸ் 7 தமிழ் செய்தியாளரை மிரட்டிய நிலையில் அவர் மீது மர்ம கும்பல் கொலை வெறி தாக்குதல் நடத்தியுள்ளது.
திருப்பூர் மாவட்டம் பல்லடம் தாலுகாவை சேர்ந்தவர் நேசப் பிரபு. இவர் நமது நியூஸ் 7 தமிழ் செய்திக் தொலைக்காட்சியின் செய்தியாளராக கடந்த ஏழாண்டுகளாக பணிபுரிந்து வருகிறார்.
இவரை இன்று செய்தி சேகரித்து விட்டு வீடு திரும்பியுள்ளார். வழக்கம் போல இரவில் வீட்டில் இருந்தபோது சில மர்ம நபர்கள் அவரை நோட்டமிட்டதாக தெரிகிறது. இதனைத் தொடர்ந்து அவர் வெளியே வந்த நேரம் பார்த்து சரமாரியாக அந்த மர்ம கும்பல் வெட்டி விட்டு தப்பியோடியுள்ளது.
மர்ம நபர்கள் தன்னை நோட்டமிட்டு வருவதாக தாக்குதலுக்கு 4 மணி நேரத்திற்கு முன்பே நியூஸ்7 தமிழ் செய்தியாளர் நேசபிரபு காவல்துறையிடம் புகார் தெரிவித்திருந்தார். இந்த நிலையில் காவல்துறையிடம் தகவல் தெரிவித்தும் எந்த நடவடிக்கையும் எடுக்காத நிலையில், மர்ம நபர்களால் தாக்குதல் நடத்தியுள்ளது குறிப்பிடத்தக்கது.
காவல்துறைக்கும் அவசர உதவி எண் 100க்கும் அவர் தொடர்ந்து அழைத்துள்ளார். இதற்கு பதிலளித்த காவலர் ஒருவர் ஸ்டேசன்ல ஆள் இல்லை. உங்களுக்கு பாதுகாப்பு வேணும்னா காவல் நிலையத்திற்கு வந்து விடுங்கள் என தெரிவித்துள்ளது பெரும் அதிர்ச்சியை ஏற்படுத்தியுள்ளது.