#SriLankaFlood | இலங்கையை புரட்டிப்போட்ட கனமழை - பலி எண்ணிக்கை 15 ஆக உயர்வு!

இலங்கையில் பெய்து வரும் கனமழை மற்றும் வெள்ளப்பெருக்கில் சிக்கி உயிரிழந்தோரின் எண்ணிக்கை 15ஆக உயர்ந்துள்ளது.

வங்கக்கடலில் உருவான பெஞ்சல் புயல் காரணமாக இலங்கையிலும் கனமழை பெய்து வருகிறது. குறிப்பாக அந்நாட்டின் கிழக்கு கடலோர பகுதிகளில் கனமழை பெய்து வருகிறது. கடந்த சில நாட்களாக இலங்கையில் பெய்து வரும் தொடர் கனமழை காரணமாக அங்குள்ள ஆறுகளில் நீர்மட்டம் அதிகரித்து வெள்ளம் பெருக்கெடுத்து ஓடுகிறது.

மேலும், பல இடங்களில் வீடுகள், சாலைகள், பயிர்கள் வெள்ளத்தில் மூழ்கியுள்ளது. இதனால் இலங்கையில் பல பகுதிகள் வெள்ளக்காடாய் காட்சியளிக்கின்றன. தொடர் கனமழையால் மக்களின் இயல்பு வாழ்க்கை பாதிக்கப்பட்டுள்ளது. பாதுகாப்பான இடங்கள் மற்றும் நிவாரண முகாம்களில் பலரும் தங்க வைக்கப்பட்டுள்ளனர்.

கனமழையால் ஏற்பட்டுள்ள வெள்ளத்தில் சிக்கியும், வீடுகள் இடிந்தும் 12 பேர் பலியாகி இருந்தனர். மேலும், பலர் மாயமாகினர். இந்த நிலையில் இலங்கையில் கனமழை மற்றும் வெள்ளத்தில் சிக்கி மாயமான 3 பேரின் உடல்கள் மீட்கப்பட்டுள்ளன. இதனால் அங்கு கனமழைக்கு பலியானோர் எண்ணிக்கை 15 ஆக உயர்ந்துள்ளது. கட்டிட இடிபாடுகளில் சிக்கியும், வெள்ளத்தில் சிக்கியும் 20 பேர் காயமடைந்துள்ளனர். மாயமானவர்களை தேடும் பணி தீவிரமாக நடைபெற்று வருகிறது.