#SpecialTrain | சென்னை திரும்புவோர் கவனத்திற்கு... தாம்பரம் - காட்டாங்குளத்தூர் இடையே நாளை சிறப்பு மின்சார ரயில்கள் இயக்கம்! எந்தெந்த நேரங்களில் தெரியுமா?

தீபாவளி பண்டிகையை கொண்டாட சொந்த ஊர்களுக்கு சென்று விட்டு சென்னை திரும்பும் பயணிகளின் வசதிக்காக தாம்பரம் - காட்டாங்குளத்தூர் இடையே நாளை சிறப்பு மின்சார ரயில்கள் இயக்கப்படுகிறது.

சென்னையில் வேலை, கல்வி உள்ளிட்டவைகளுக்காக தங்கி இருந்தவர்கள் தீபாவளி பண்டிகையை கொண்டாட தங்கள் சொந்த ஊர்களுக்கு சென்றுள்ளனர். விடுமுறை தினம் இன்றுடன் நிறைவடைவதால் பலரும் நாளை சென்னை திரும்ப வாய்ப்புள்ளதாக எதிர்பார்க்கப்படுகிறது. ஒரே நேரத்தில் ஏராளமானோர் சென்னை திரும்ப வாய்ப்பிருப்பதால் பயணிகளின் வசதிக்காக நாளை (நவ.4) தாம்பரம் - காட்டாங்குளத்தூர் இடையே சிறப்பு மின்சார ரயில்கள் இயக்கப்படுகிறது.

இது தொடர்பாக தெற்கு ரயில்வே சென்னை கோட்டம் வெளியிட்டுள்ள செய்திக்குறிப்பில் தெரிவித்திருப்பதாவது,

"தீபாவளி பண்டிகையை கொண்டாட சொந்த ஊர்களுக்கு சென்று விட்டு சென்னை திரும்பும் பயணிகளின் வசதிக்காக சிறப்பு மின்சார ரயில்கள் இயக்கப்படுகிறது. அதன்படி, காட்டாங்குளத்தூரில் இருந்து நாளை (நவ.4) அதிகாலை 4, 4.30, 5, 5.45, 6.20 ஆகிய நேரங்களில் தாம்பரத்திற்கு சிறப்பு மின்சார ரயில்கள் இயக்கப்படுகிறது.

இந்த ரயில் பொத்தேரி, கூடுவாஞ்சேரி, ஊரப்பாக்கம், வண்டலூர் ஆகிய ரெயில் நிலையங்களில் நின்று செல்லும். அதே போல, தாம்பரத்தில் இருந்து அதிகாலை 5.05 மணி மற்றும் 5.40 மணிக்கு காட்டாங்குளத்தூருக்கு 2 சிறப்பு மின்சார ரயில்கள் இயக்கப்படுகிறது."

இவ்வாறு அதில் தெரிவிக்கப்பட்டுள்ளது.