#ProKabaddiLeague |  யுபி யோத்தாஸ் - யு மும்பா அணிகள் இன்று மோதல்!

புரோ கபடி லீக் போட்டியின் இன்றைய ஆட்டத்தில் யுபி யோத்தாஸ் - யு மும்பா, குஜராத் ஜெயண்ட்ஸ் - ஹரியானா ஸ்டீலர்ஸ் அணிகள் மோதுகின்றன.

11-வது புரோ கபடி லீக் போட்டி ஹைதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த நிலையில், இந்த தொடரில் இன்று (நவ.10) நடைபெறும் முதல் லீக் ஆட்டத்தில் யுபி யோத்தாஸ் - யு மும்பா அணிகள் மோதுகின்றன. இதில் யுபி யோத்தாஸ் அணி இதுவரை ஆடிய 7 போட்டிகளில் மூன்றில் வெற்றி பெற்ற நிலையில் பாயிண்ட் டேபிளில் 10வது இடத்தில் உள்ளது. யு மும்பா அணி 7 போட்டிகளில் நான்கில் வெற்றி பெற்ற நிலையில் பாயிண்ட் டேபிளில் 3வது இடத்தில் உள்ளது.

இவ்விரு அணிகளுக்கும் இடையிலான போட்டி இன்று இரவு 8 மணிக்கு தொடங்குகிறது. தொடர்ந்து 9 மணிக்கு நடைபெறும் 2வது லீக் ஆட்டத்தில் பாயிண்ட்ஸ் டேபிளில் 12வது (கடைசி) இடத்தில் இருக்கும் குஜராத் ஜெயண்ட்ஸ் அணி, பாயிண்ட்ஸ் டேபிளில் 7வது இடத்தில் உள்ள ஹரியானா ஸ்டீலர்ஸ் அணியுடன் மோதுகிறது.