#ProKabaddiLeague | யுபி யோத்தா - பாட்னா பைரட்ஸ் அணிகள் இன்று மோதல்!

புரோ கபடி லீக் போட்டியின் இன்றைய ஆட்டத்தில் யுபி யோத்தா - பாட்னா பைரட்ஸ் அணிகள் மோதுகின்றன.

11-வது புரோ கபடி லீக் போட்டி ஐதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த நிலையில், இன்று (நவ.2) நடைபெறும் முதல் ஆட்டத்தில் யுபி யோத்தா அணி, மூன்று முறை சாம்பியனான பாட்னா பைரட்ஸ் அணியை எதிர்கொள்கிறது. யுபி யோத்தா அணி இதுவரை ஆடிய 5 போட்டிகளில் 3 முறை வெற்றி பெற்று பாயிண்ட்ஸ் டேபிளில் 3 வது இடத்தில் உள்ளது. பாட்னா பைரட்ஸ் அணி ஆடிய 4 போட்டிகளில் இரண்டு முறை வெற்றி பெற்று 9 வது இடத்தில் உள்ளது.

இரு அணிகளும் இந்த போட்டியில் வெற்றி பெற்று பாயிண்ட்ஸ் டேபிளில் முன்னேற எண்ணும். இதனால் இந்த போட்டியில் பரபரப்புக்கு பஞ்சம் இருக்காது. இந்த போட்டி இன்று இரவு 8 மணிக்கு தொடங்குகிறது. இதனையடுத்து இரவு 9 மணிக்கு தொடங்கும் போட்டியில் பாயிண்ட் டேபிளில் 10 வது இடத்தில் இருக்கும் தெலுகு டைட்டன்ஸ் அணி, கடைசி (12வது இடம்) இடத்தில் இருக்கும் பெங்களூரு புல்ஸ் அணியுடன் மோதுகிறது.