#ProKabaddiLeague | ஹரியானா ஸ்டீலர்ஸ், குஜராத் ஜெயண்ட்ஸ் அணிகள் வெற்றி!

புரோ கபடி லீக் போட்டியின் நேற்றைய ஆட்டத்தில் ஹரியானா ஸ்டீலர்ஸ், குஜராத் ஜெயண்ட்ஸ் அணிகள் வெற்றி பெற்றன.

11-வது புரோ கபடி லீக் போட்டி ஹைதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த தொடரின் முதற்கட்ட லீக் ஆட்டங்கள் ஹைதராபாத்தில் நடந்து முடிந்தன. இதனையடுத்து தொடரின் 2வது கட்ட லீக் ஆட்டங்கள் நொய்டாவில் நடைபெற்று வருகின்றன. இந்த நிலையில், இந்த தொடரில் நேற்று (நவ.27) நடைபெற்ற முதல் லீக் புனேரி பால்டன் - ஹரியானா ஸ்டீலர்ஸ் அணிகள் மோதின. இந்த போட்டியில் தொடக்கம் முதலே ஆதிக்கம் செலுத்திய ஹரியானா ஸ்டீலர்ஸ் அணி 38-28 என்ற புள்ளிக்கணக்கில் புனேரி பால்டனை வீழ்த்தி அபார வெற்றி பெற்றது.

இதுவரை 14 போட்டிகளில் விளையாடியுள்ள ஹரியானா ஸ்டீலர்ஸ் அணி 11 வெற்றி, 3 தோல்வி என 56 புள்ளிகளுடன் முதல் இடத்தில் உள்ளது. தொடர்ந்து நடைபெற்ற மற்றொரு லீக் ஆட்டத்தில் பெங்கால் வாரியர்ஸ் - குஜராத் ஜெயண்ட்ஸ் அணிகள் மோதிக்கொண்டன. விறுவிறுப்பாக நடைபெற்ற இந்த போட்டியில் 39-37 என்ற புள்ளிக் கணக்கில் பெங்கால் வாரியர்ஸை வீழ்த்தி குஜராத் ஜெயண்ட்ஸ் அணி திரில் வெற்றி பெற்றது.