“மயில் போல பொண்ணு ஒன்னு....” - திரைத்துறையில் பவதாரிணி கடந்து வந்த பாதை..!
திரையுலகில் மெல்லிசைக் குரலால் ரசிகர்களின் இதயங்களைக் கொள்ளை கொண்ட பவதாரிணியின் வாழ்க்கைப் பயணத்தை சற்று திரும்பிப் பார்க்கலாம்....
நடுத்தர குடும்பத்தில் பிறந்து தனக்கென தனி இடத்தை திரைத்துறையில் பிடித்தவர் இளையராஜா. நீண்ட காலம் தமிழ் சினிமா ரசிகர்களை வேறு இசையமைப்பாளரிடம் செல்லாத வகையில் தன்னுடைய இசையால் கட்டிப்போட்டவர் இளையராஜா. ‘இசைஞானி’ என்று போற்றபடும் அவரது மகள் பவதாரிணியும் இசை உலகில் தனக்கென தனி ரசிகர் கூட்டத்தை கொண்டிருப்பவர்.
பவதாரிணி, தன்னுடைய மெல்லிய குரல் வளத்தால் இளசுகளை கட்டி போட்டவர். இளையராஜாவின் இசையில் ராசையா ப டத்தில் இடம் பெற்று இருக்கும் மஸ்தானா மஸ்தானா பாடல் மூலம் தமிழ் திரை உலகிற்கு அறிமுகமானவர். தன்னுடைய திரை இசை பயணத்தின் தொடக்கம் முதலே தந்தை இளையராஜா, அண்ணன் கார்த்திக் ராஜா, தம்பி யுவன் ஷங்கர் ராஜா இசையில் பயணித்தவர்.
எம்.குமரன் படத்தில் வரும் ‘அய்யோ அய்யோ’ பாடல், தாமிரபரணி படத்தின் ‘தாலியே தேவையில்ல’ போன்ற பாடல்கள் பவதாரணியின் ஹிட் லிஸ்ட். அதேபோல், ஆயுத எழுத்து படத்தின் ‘யாக்கைத் திரி’, காக்க காக்க படத்தின் ‘என்னைக் கொஞ்சம் மாற்றி’ போன்ற தமிழ் சினிமாவின் குறிப்பிடத்தக்க பாடல்களை அவர் பாடியுள்ளார். ப்ரெண்ட்ஸ் படத்தில் ‘தென்றல் வரும் நிலவே’, மாநாடு படத்திலிருந்து ‘மெஹரசைலா’ பாடல், ஒருநாள் ஒரு கனவு படத்தில் ‘காற்றில் வரும் கீதமே’ பாடலும் ரசிகர்களை மெய் மறந்து கேட்க வைக்கும். அதே போல் அனேகன் படத்தில் ‘ஆத்தாடி ஆத்தாடி’ பாடல் என்றும் பிளேலிஸ்டில் நம்பர் ஒன்.
இந்நிலையில் 47 வயதாகும் பவதாரிணி கடந்த 5 மாதங்களாக புற்றுநோய்க்கு சிகிச்சை பெற்று வந்தார். இலங்கையில் ஆயுர்வேத சிகிச்சை பெற்று வந்த பவதாரிணி ஜனவரி 25ம் தேதி மாலை 5.30 மணி அளவில் காலமானார். இலங்கை தலைநகர் கொழும்புவில் வரும் ஜனவரி 27 ஆம் தேதி மற்றும் ஜனவரி 28 ஆம் தேதி 'இளையராஜா லைவ் இன் கான்செர்ட்' என்ற பெயரில் இசை கச்சேரி நடைபெறவிருந்தது. அந்த நிகழ்வுக்காக இலங்கை சென்ற இளையராஜாவுக்கு இது எதிர்பாராத சோகம் தான்.