"இனி NDA தான் , வேறு எங்கும் செல்வதற்கான கேள்வியே இல்லை" - முதலமைச்சராக பதவியேற்ற பின் நிதிஷ் குமார் பேட்டி.!

பாஜக எம்.எல்.ஏ.க்களின் ஆதரவு கடிதத்தை நிதீஷ் குமார் ஆளுநரிடம் வழங்கினார். தொடர்ந்து பீகாரில் ஆட்சி அமைப்பதற்கும் உரிமை கோரியுள்ளார். 243 உறுப்பினா்களைக் கொண்ட பீகாா் சட்டப் பேரவையில், ஐக்கிய ஜனதா தளம் மற்றும் பாஜகவுக்கு உள்ள 128 எம்.எல்.ஏ.க்களின் ஆதரவு கடிதத்தை பீகார் ஆளுநரிடம் நிதீஷ் குமார் வழங்கினார். இன்று மாலையே பாஜக ஆதரவுடன் மீண்டும் முதலமைச்சராக நிதீஷ் குமார் பதவியேற்றார்.

"நான் முன்பு தேசிய ஜனநாயக கூட்டணியில் தான் இருந்தேன், நாங்கள் வெவ்வேறு பாதையில் சென்றோம், ஆனால் இப்போது நாங்கள் ஒன்றாக இருக்கிறோம், இனி ஒன்றாகவே இருப்போம். புதிய அமைச்சரவையில் 8 பேர் அமைச்சர்களாக பதவியேற்றுள்ளனர், மீதமுள்ளவர்கள் விரைவில் பதவியேற்பார்கள். சாம்ராட் சவுத்ரி மற்றும் விஜய் சின்ஹா துணை முதல்வர்களாக நியமிக்கப்பட்டுள்ளனர்.

மாநிலத்தின் வளர்ச்சி மற்றும் முன்னேற்றத்திற்காக எங்கள் கட்சி பாடுபடும். நாங்கள் அதையே செய்வோம், வேறொன்றுமில்லை. தேஜஸ்வி மாநில மக்களுக்காக எதுவும் செய்யவில்லை. இப்போது நான் மீண்டும் தேசிய ஜனநாயக கூட்டணிக்கே திரும்பிவிட்டேன், இனி வேறு எங்கும் செல்வதற்கான கேள்விக்கே இடமில்லை" என்று நிதிஷ் குமார் தெரிவித்துள்ளார்.