4 ஆண்டுகளாக சம்பளம் இல்லாமல் வேலை செய்யும் முகேஷ் அம்பானி!

ரிலையன்ஸ் குழுமத்தின் தலைவர் முகேஷ் அம்பானி தொடர்ந்து 4  ஆண்டுகளாக சம்பளம் பெறாமல் பணியாற்றி வருவதாக தகவல் வெளியாகியுள்ளது. 

பெட்ரோலியம், தொலைத்தொடர்பு என பல்வேறு துறைகளில் ரிலையன்ஸ் குழுமம் பங்காற்றி வருகிறது. இந்த குழுமத்தின் தலைவராக முகேஷ் அம்பானி உள்ளார். கடந்த 1977-ஆம் ஆண்டு முதல் ரிலையன்ஸ் நிறுவனத்தின் நிர்வாகக் குழுவில் இடம்பெற்றுள்ள முகேஷ் அம்பானி, அவரின் தந்தை திருபாய் அம்பானி 2002-இல் மறைந்த பிறகு, நிறுவனத்தின் தலைமைப் பொறுப்பை ஏற்றார்.

கடந்த 4 ஆண்டுகளுக்கு முன்பு வரை தனது நிறுவனத்தில் பணியாற்றுவதற்காக ஆண்டுக்கு ரூ.15 கோடியை சம்பளமாகப் பெற்று வந்தார். இதனிடையே 2020-ஆம் ஆண்டில் கொரோனா பாதிப்பால் ஏற்பட்ட பொருளாதாரச் சிக்கலால், நிறுவனத்தில் இருந்து சம்பளம் பெறுவதை நிறுத்திக் கொள்வதாக தெரிவித்துள்ளார். அதன்படி கடந்த 4 ஆண்டுகளாக அவர் சம்பளம் ஏதும் பெறவில்லை. ரிலையன்ஸ் குழுமத்தின் நிதிநிலை அறிக்கையில் இத்தகவல் இடம் பெற்றுள்ளது.

ரிலையன்ஸ் குழுமத்தில் முகேஷ் அம்பானியின் குடும்பத்துக்கு 50.33 சதவீதம் பங்குகள்
உள்ளன. முகேஷ் அம்பானி குடும்பத்தினருக்கு 2023-24-இல் ஈவுத்தொகை மட்டும் ரூ.3,322.7 கோடி கிடைத்துள்ளது. முகேஷ் அம்பானியின் மனைவி நீடா அம்பானி, நிறுவனத்தில் இருந்து ரூ.99 லட்சமும், அவரின் இரு மகன்கள் மற்றும் ஒரு மகள் தலா ரூ.1 கோடியும் ஊதியம் அல்லாத பிறவகை பணப் பலன்களாகப் பெற்றுள்ளனர்.