‘இந்தியன் 2’ படத்திற்கான கமல்ஹாசனின் ப்ளான்: சென்னை - பெங்களூரு போட்டியின்போது காத்திருக்கும் சர்ப்ரைஸ்!

பெங்களூரில் இன்று நடைபெறும் 68வது ஐபிஎல் லீக் போட்டியை இன்னும் விறுவிறுப்பாக மாற்ற இயக்குநர் ஷங்கரும், நடிகர் கமல்ஹாசனும் போட்டியின் நேரலையில் கலந்து கொள்கின்றனர். 

ஷங்கர் இயக்கத்தில் கமல்ஹாசன் நடிப்பில் வெளிவந்த மிகப்பெரிய வெற்றி திரைப்படம் “இந்தியன்”. இந்த திரைப்படத்தின் இரண்டாம் பாகம் தற்போது உருவாகி வருகிறது. இந்த படத்தில் சமுத்திரகனி, பாபி சிம்ஹா, காஜல் அகர்வால், சித்தார்த், ராகுல் ப்ரீத் சிங், ப்ரியா பவானி சங்கர் உள்ளிட்ட பலரும் முக்கிய கதாபாத்திரத்தில் நடித்துள்ளனர். படத்தின் இறுதிக்கட்ட பணிகள் விறுவிறுப்பாக நடைபெற்று வருகிறது.

இதனையடுத்து படம் வரும் ஜூலை மாதம் திரையில் வெளியாகும் என எதிர்பார்க்கப்படுகின்றது. இந்நிலையில் படத்தின் புரமோஷன் வேலைகளில் படக்குழுவினர் இறங்கியுள்ளனர். அந்த வகையில் பெங்களூருவில் இன்று (மே 18) நடைபெற உள்ள சென்னை மற்றும் பெங்களூரு அணிகளுக்கு இடையேயான ஐபிஎல் போட்டியின்போது கமல் மற்றும் ஷங்கர் இந்தியன் 2 படத்தின் ப்ரோமோஷனில் ஈடுபட இருக்கின்றனராம்.

இப்போட்டியின் போது ஸ்டார் ஸ்போர்ட்ஸ் தமிழில் நடிகர் கமலும், ஷங்கரும் நேரலையில் கலந்துகொள்ள இருப்பதாக படக்குழு அறிவித்துள்ளது. அப்போது கிரிக்கெட் பற்றியும் இந்தியன் 2 படத்தை பற்றியும் பல விஷயங்களை இருவரும் பகிர காத்துக்கொண்டு இருக்கின்றனர். இந்த ஆண்டு ஐபிஎல் தொடரிலேயே இன்றைய போட்டி மிக முக்கியமான போட்டியாகும்.

ஏனெனில் இது தோனியின் கடைசி சீசன் என்பதால். போட்டியில் சென்னை வெல்லுமா? வெல்லாதா என்பதைவிட தோனியின் கடைசி சீசன் என்பதே ரசிகர்கள் மத்தியில் பெரும் சோகத்தை ஏற்படுத்தியுள்ளது. மேலும் கடந்த ஐந்து போட்டிகளில் பெங்களூரு அணி தொடர் வெற்றியை பதிவு செய்து வந்துள்ளது. இதனால் பெங்களூரு அணி மீதான எதிர்பார்ப்பும் அதிகரித்துள்ளது.

இந்நிலையில் இன்று 68வது லீக் போட்டியில் பெங்களூரு அணியும்,சென்னை அணியும் பெங்களூரு சின்னசுவாமி மைதானத்தில் மோதுகின்றன.