"ஜூ 7ம் தேதி மீண்டும் டெல்லி வருவேன்" - சந்திரபாபு நாயுடு

தேசிய ஜனநாயகக் கூட்டணியின் ஆலோசனைக் கூட்டம் நிறைவடைந்த நிலையில், ஜூன் 7ம் தேதி மீண்டும் டெல்லி வருவேன் என தெலுங்கு தேசம் கட்சியின் தலைவர் சந்திரபாபு நாயுடு தெரிவித்துள்ளார்.

நாடு முழுவதும் 7 கட்டங்களாக நடத்தப்பட்ட மக்களவை தேர்தலில் பதிவான வாக்குகள் நேற்று (ஜூன் 4) காலை 8 மணி முதல் எண்ணப்பட்டன. இத்தேர்தலில் பாஜக தலைமையிலான தேசிய ஜனநாயக கூட்டணிக்கும்,  காங்கிரஸ், திமுக, சமாஜ்வாதி உள்ளிட்ட எதிர்க்கட்சிகள் அங்கம் வகிக்கும் INDIA கூட்டணிக்கும் இடையே நேரடி போட்டி நிலவியது. பாஜக தலைமையிலான தேசிய ஜனநாயக கூட்டணி 292 தொகுதிகளில் வெற்றி பெற்றது . INDIA கூட்டணி 234 தொகுதிகளில் வெற்றி பெற்றது.

இதில், பாஜக தலைமையிலான தேசிய ஜனநாயக கூட்டணி அதிக இடங்களில் முன்னிலை பெற்றது. வாக்கு எண்ணிக்கை முழு விவரங்கள் இன்று வெளிவந்தன. இதன்படி, நடந்து முடிந்த தேர்தலில், பாஜக 240 தொகுதிகளில் வெற்றி பெற்றது.  இதனால், ஆட்சியமைக்க தேவையான 272 என்ற எண்ணிக்கையை விட 32 தொகுதிகள் குறைவாகவே பெற்றுள்ளது. இதனையடுத்து,  டெல்லியில் நரேந்திர மோடி இல்லத்தில் தேசிய ஜனநாயகக் கூட்டணி கட்சி தலைவர்களின் கூட்டம் நடைபெற்றது.

இக்கூட்டத்தில் பாஜக அமைச்சர்கள்,  மூத்த நிர்வாகிகள் உள்பட தெலுங்கு தேசம் கட்சியின் தலைவர் சந்திரபாபு நாயுடு,  ஐக்கிய ஜனதா தளம் கட்சியின் தலைவர் நிதீஷ் குமார் ஆகியோர் பங்கேற்றனர்.  இந்தக் கூட்டத்தில் பாஜக தனித்துப் பெரும்பான்மை பெறாததால் கூட்டணி கட்சிகளுடன் சேர்ந்து ஆட்சி அமைப்பது,  தேசிய ஜனநாயகக் கூட்டணிக்கு ஆதரவு தெரிவிப்பது உள்ளிட்டவை குறித்து விவாதிக்கப்பட்டதாக கூறப்படுகிறது.

தொடர்ந்து, கூட்டம் முடிவடைந்ததையடுத்து சந்திரபாபு நாயுடுவும்,  நிதீஷ்குமாரும் புறப்பட்டனர்.  இந்த நிலையில், பாஜகவுக்கு ஆதரவு தெரிவிக்கிறீர்களா? என செய்தியாளர்கள் எழுப்பிய கேள்விக்கு பதிலளித்த தெலுங்கு தேசம் கட்சியின் தலைவர் சந்திரபாபு நாயுடு,  "ஜூ 7ம் தேதி மீண்டும் இங்கு (டெல்லி) வருவேன்" என தெரிவித்தார்.  தேசிய ஜனநாயக கூட்டணி எம்.பி.க்கள் கூட்டம் ஜூன் 7ஆம் தேதி நடைபெறவுள்ளது.  இக்கூட்டத்தில் தெலுங்கு தேசம் கட்சியின் தலைவர் சந்திரபாபு நாயுடுவும், அக்கட்சியின் உறுப்பினர்களும் பங்கேன்றனர்.