"சிவகார்த்திகேயன் மாதிரி இருக்குதே.." - வெளியானது ‘ஏஸ்’ படத்தின் டிரெய்லர்.. SK-வை சர்ப்ரைஸ் செய்த படக்குழு!

விஜய் சேதுபதியின் நடிப்பில் கடந்த ஆண்டு வெளியான ‘மகாராஜா’ மற்றும் ’விடுதலை – 2’ ஆகிய இரண்டு படங்களும் அவருக்கு வெற்றிப் படங்களாக அமைந்தன. தொடர்ந்து, அவர் இயக்குநர் மிஷ்கினின் ‘டிரெயின்’ படத்தில் நடித்து வருகிறார். இதறகிடையே, ‘ஒரு நல்ல நாள் பார்த்து சொல்றேன்’ படத்தின் இயக்குநர் பி.ஆறுமுகக் குமார் இயக்கத்தில் விஜய் சேதுபதி நடித்து முடித்துள்ளார்.

இப்படத்திற்கு ‘ஏஸ்’ என பெயரிடப்பட்டுள்ளது. இந்தப் படத்தில் விஜய் சேதுபதியுடன் இணைந்து ருக்மணி வசந்த், யோகி பாபு உள்ளிட்ட பலர் முக்கிய கதாபாத்திரங்களில் நடித்துள்ளனர். இப்படத்திற்கு ஜஸ்டின் பிராபகரன் இசையமைத்துள்ளார். இப்படத்தின் படப்பிடிப்பு மலேசியாவில் விறுவிறுப்பாக நடைபெற்று முடிந்தது.

இப்படம் மே 23ம் வெளியாக உள்ளதாக அண்மையில் படக்குழு அறிவித்தது. இதன் அடுத்த அப்டேட் எப்போது வெளியாகும் என எதிர்பார்க்கப்பட்டது. இந்த நிலையில், இப்படத்தின் டிரெய்லர் இன்று (மே 11) வெளியாகும் என படக்குழு அறிவித்தது. அதன்படி, இப்படத்தின் டிரெய்லர் வெளியாகியுள்ளது. இதன் டிரெய்லரை நடிகர் சிவகார்த்திகேயன் வெளியிட்டுள்ளார். இதன் ஒரு காட்சியில் சிவகார்த்திகேயன் பெயர் இடம்பெற்றிருப்பது ரசிக்கும்படி அமைந்துள்ளது. இதனை குறிப்பிட்டுள்ள சிவகார்த்திகேயன் "முடிவு எனக்கு சர்ப்ரைஸ் இருந்தது" என தெரிவித்துள்ளார்.