ஒரே நாளில் வெளியாகும் 'குட் பேட் அக்லி' மற்றும் 'இட்லி கடை' திரைப்படம் - ரசிகர்கள் எதிர்பார்ப்பு!

நடிகர்கள் அஜித் மற்றும் தனுஷ் ஆகியோரின் படங்கள் ஒரே நாளில் திரைக்கு வரவுள்ளதால் ரசிகர்கள் மிகுந்த உற்சாகத்தில் உள்ளனர்.

நடிகர் அஜித்குமார் ரசிகர்களுக்கு 2025-ம் ஆண்டு டபுள் ட்ரீட்டாக அமையவுள்ளது. ஒரே வருடத்தில் அஜித்தின் விடாமுயற்சி மற்றும் குட் பேட் அக்லி திரைப்படங்கள் வெளியாகவுள்ளன. முதலில் மகிழ்திருமேனி இயக்கத்தில் அஜித் நடிப்பில் உருவாகியிருக்கும் விடாமுயற்சி திரைப்படம் பொங்கலை முன்னிட்டு திரைக்கு வரும் என கூறப்பட்ட நிலையில், திடீரென படத்தின் ரிலீஸ் தேதியை தயாரிப்பு நிறுவனம் தள்ளி வைத்தது.

இதனால் பொங்கலுக்கு அஜித் படம் திரைக்கு வரும் என காத்திருந்த ரசிகர்களுக்கு அதிர்ச்சியை ஏற்படுத்திய நிலையில், தற்போது அஜித்தின் ’குட் பேட் அக்லி’ திரைப்படம் வெளியாகும் என அறிவிக்கப்பட்டுள்ளது. ‘மார்க் ஆண்டனி’ என்ற ஹிட் படத்தை இயக்கியதற்கு பின் இயக்குநர் ஆதிக் ரவிச்சந்திரன் அஜித்தை வைத்து ‘குட் பேட் அக்லி’ என்ற படத்தை உருவாக்கியுள்ளார். இப்படத்தில் அஜித் உடன் நடிகை த்ரிஷா, பிரசன்னா, அர்ஜுன் தாஸ் உள்ளிட்ட பலர் முக்கிய கதாபாத்திரங்களில் நடித்துள்ளனர்.

மைத்ரி மூவி மேக்கர்ஸ் நிறுவனம் தயாரித்துள்ள இப்படத்திற்கு தேவி ஸ்ரீ பிரசாத் இசையமைத்துள்ளார். மேலும் ஜி.வி பிரகாஷ் பின்னணி இசையை மேற்கொண்டுள்ளார். இப்படத்தின் டப்பிங் பணிகள் முடிவடைந்த நிலையில் படக்குழு ரிலீஸ் தேதியை அறிவித்துள்ளது. அதன்படி குட் பேட் அக்லி திரைப்படமானது வரும் ஏப்ரல் 10-ம் தேதி திரைக்கு வரும் என கூறப்பட்டுள்ளது. இதே தேதியில் தனுஷின் இட்லிகடை திரைப்படமும் திரைக்கு வரவுள்ளது.

இது தனுஷின் 52-வது திரைப்படமாகும். இந்த படத்தினை டான் பிக்சர்ஸ் நிறுவனம் தயாரித்துள்ளது. இதில் நித்யா மேனன், ராஜ் கிரண் ஆகியோர் முக்கிய கதாப்பாத்திரத்தில் நடித்துள்ளனர். அந்தவகையில் தனுஷ் மற்றும் அஜித் இருவரும் நேரடியாக களத்தில் மோதிக்கொள்ள உள்ளனர். விடமுயற்சி படத்தின் ரிலீஸ் தேதி இன்னும் அறிவிக்கப்படாத நிலையில், விரைவில் அறிவிப்பு வெளியாகும் என எதிர்ப்பார்க்கப்படுகிறது. ஒரே நாளில் தனுஷ் மற்றும் அஜித்தின் திரைப்படம் வெளியாகவுள்ளதால் ரசிகர்கள் மிகுந்த உற்சாகத்தில் உள்ளனர்.