பழைய குற்றால அருவியில் குளிக்க நேரக் கட்டுப்பாடு மாற்றம் - சுற்றுலாப் பயணிகள் கவனத்திற்கு!

தென்காசி மாவட்டத்தில் உள்ள முக்கிய சுற்றுலாத் தலங்களில் ஒன்றான பழைய குற்றால அருவிக்குச் செல்லும் பயணிகளுக்கு வனத்துறை ஒரு புதிய அறிவிப்பை வெளியிட்டுள்ளது. இதுவரை அருவியில் குளிப்பதற்கு இருந்த நேரக் கட்டுப்பாட்டில் தற்போது மாற்றம் செய்யப்பட்டுள்ளது.

பழைய குற்றால அருவியில் சுற்றுலாப் பயணிகள் குளிப்பதற்கு முன்பு காலை 6 மணி முதல் இரவு 8 மணி வரை அனுமதி வழங்கப்பட்டிருந்தது. தற்போது இந்த நேரமானது குறைக்கப்பட்டு, காலை 6 மணி முதல் மாலை 6:30 மணி வரை மட்டுமே குளிக்க அனுமதி வழங்கப்படும் என வனத்துறையினர் அறிவித்துள்ளனர். இந்த நேரக் கட்டுப்பாடு உடனடியாக அமலுக்கு வந்துள்ளது.

பழைய குற்றால அருவி யாருக்குச் சொந்தம் என்ற விவகாரம் நீண்ட காலமாக நிலுவையில் இருந்தது. இந்தச் சிக்கலுக்கு தற்போது தீர்வு எட்டப்பட்டு, அருவியின் கட்டுப்பாட்டை வனத்துறையினர் முழுமையாக ஏற்றுக்கொண்டனர்.

இதன் காரணமாகவே, சுற்றுலாப் பயணிகளின் பாதுகாப்பு மற்றும் சூழலியல் நலனைக் கருத்தில் கொண்டு இந்த நேரக் கட்டுப்பாடுகள் விதிக்கப்பட்டுள்ளதாகத் தெரிகிறது. இந்த அறிவிப்பின் மூலம், இனிமேல் சுற்றுலாப் பயணிகள் வனத்துறையின் கட்டுப்பாட்டு விதிகளின்படி குறிப்பிட்ட நேரத்தில் மட்டுமே அருவியைச் சென்று பார்வையிடவும், குளிக்கவும் முடியும்.

சுற்றுலாப் பயணிகள் இந்த மாற்றங்களை அறிந்து அதற்கேற்ப தங்கள் பயணத் திட்டங்களை வகுத்துக்கொள்ள வேண்டும் என அறிவுறுத்தப்பட்டுள்ளது.