இந்தியன் 2 வெளியாகி அடுத்த 6மாதத்தில் இந்தியன் 3 - CSK போட்டியிடையே சர்ப்ரைஸ் அப்டேட் கொடுத்த நடிகர் கமல்ஹாசன்!

இந்தியன் 2 வெளியாகி அடுத்த 6மாதத்தில் இந்தியன் 3 வெளியாகும் என CSK - RCB போட்டியிடையே நடிகர் கமல்ஹாசன் சர்ப்ரைஸ் அப்டேட் கொடுத்துள்ளார்.

ஷங்கர் இயக்கத்தில் கமல்ஹாசன் நடிப்பில் வெளிவந்த மிகப்பெரிய வெற்றி திரைப்படம் “இந்தியன்”. இந்த திரைப்படத்தின் இரண்டாம் பாகம் தற்போது உருவாகி வருகிறது. இந்த படத்தில் சமுத்திரகனி, பாபி சிம்ஹா, காஜல் அகர்வால், சித்தார்த், ராகுல் ப்ரீத் சிங், ப்ரியா பவானி சங்கர் உள்ளிட்ட பலரும் முக்கிய கதாபாத்திரத்தில் நடித்துள்ளனர். படத்தின் இறுதிக்கட்ட பணிகள் விறுவிறுப்பாக நடைபெற்று வருகிறது.

இதனையடுத்து படம் வரும் ஜூலை மாதம் திரையில் வெளியாகும் என எதிர்பார்க்கப்படுகின்றது. இந்நிலையில் படத்தின் புரமோஷன் வேலைகளில் படக்குழுவினர் இறங்கியுள்ளனர். அந்த வகையில் பெங்களூருவில் இன்று (மே 18) நடைபெற்று வரும் சென்னை மற்றும் பெங்களூரு அணிகளுக்கு இடையேயான ஐபிஎல் போட்டியின்போது கமல் மற்றும் ஷங்கர் இந்தியன் 2 படத்தின் ப்ரோமோஷனில் ஈடுபட இருப்பதாக காலை அறிவிக்கப்பட்டது.

இப்போட்டியின் போது ஸ்டார் ஸ்போர்ட்ஸ் தமிழில் நடிகர் கமலும், இயக்குநர் ஷங்கரும் நேரலையில் கலந்துகொண்டனர். அப்போது கிரிக்கெட் பற்றியும் இந்தியன் 2 படத்தை பற்றியும் பல விஷயங்களை இருவரும் பகிர்ந்து கொண்டனர்.

ஸ்டார் ஸ்போர்ட்ஸ் வர்ணணையாளர்களுடன் பேசுகையில் நடிகர் கமல்ஹாசன் தெரிவித்ததாவது..

“இந்தியன் 2 படத்திற்கு ஒப்புக்கொள்ள காரணம் இயக்குநர் ஷங்கர் இந்தியன் - 3 பாகத்திற்கான கதையையும் இணைத்தே சொன்னார். இந்தியன் 2 ஜூலை மாதம் வெளியாகிறது. அதைத் தொடர்ந்து, அடுத்த 6 மாதம் கழித்து இந்தியன் - 3 திரைப்படமும் வெளியாகும்"  என ரசிகர்களுக்கு நடிகர் கமல்ஹாசன் சர்பிரைஸ் தகவலைக் கொடுத்துள்ளார்.