15 கி.மீ. தண்டவாளத்தில் நடந்து வந்த பயணிகள் - ஸ்ரீவைகுண்டம் ரயிலில் சிக்கி தவித்தது குறித்து வேதனை!

ஸ்ரீவைகுண்டம் ரயிலில் சிக்கி தவித்தவர்கள் 15 கிலோ மீட்டர் தூரத்திற்கு தண்டவாளம் வழியாக நடந்தே வந்ததாக தெரிவித்தனர். 

தென் மாவட்டங்களில் பெய்த கன மழையால் தூத்துக்குடி மாவட்டம் ஸ்ரீவைகுண்டம் ரயில் நிலையத்தில் 500 பயணிகள் 3-வது நாளாக சிக்கி தவிக்கின்றனர்.  நெல்லை, கன்னியாகுமரி,  தென்காசி,  தூத்துக்குடி மாவட்டங்களில் கடந்த 3 நாட்களாக அதி கனமழை பெய்தது.

இந்நிலையில்,  ஸ்ரீவைகுண்டம் ரயிலிலிருந்து திருநெல்வேலி வரை ரயில் பாதை வழியாக பயணிகள் நடந்து வந்தனர். இது குறித்து நமது நியூஸ் 7 தமிழ் செய்தியாளர் பிரசாந்த்திடம் அவர்கள் கூறுகையில்,  ரயிலில் உணவு இல்லாமல் தவித்து வந்ததாகவும்,  15 கி.மீ ரயில் பாதை வழியாக நடந்து வந்ததாகவும்,  700 க்கு மேற்பட்டோர் ரயில் தவிப்பதாகவும் தெரிவித்தனர்.

அத்துடன்,  அரசிடமிருந்து இன்று காலை வரை உணவு வரவில்லை எனவும், ஸ்ரீவைகுண்டம் மக்கள் தான் ரயிலில் உள்ளவர்களுக்கு உணவு சமைத்து கொடுத்ததாகவும் அவர்கள் தெரிவித்தனர்.

ஸ்ரீவைகுண்டம் ரயிலிருந்து நடந்து வந்த சுமார் 100 க்கு மேற்பட்ட பயணிகள் தாதன்குளத்தில் ரயில் நிலையத்தில் தஞ்சமடைந்துள்ளனர்.  அங்குள்ள மக்கள் அவர்களுக்கு உணவு, தண்ணீர் கொடுத்து உதவி வருகின்றனர்.  மேலும் இங்கிருந்து நடந்து செல்ல முடியாமல் பெண்கள், குழந்தைகள் தவித்து வருகின்றனர்.