"வீரத்தையும் தியாகத்தையும் போற்றி வணங்குகிறேன்" - பெருங்காமநல்லூர் தியாகிகளின் நினைவு தினத்தையொட்டி இபிஎஸ் பதிவு!

ஆங்கிலேயர் ஆட்சிக்காலத்தில் குறிப்பிட்ட சில இன மக்களை குற்றப் பரம்பரையினராக அறிவித்து, கைரேகைச் சட்டம் அமல்படுத்தப்பட்டது. இந்தச் சட்டத்தின்படி, அந்தந்த மாவட்ட ஆட்சியர்கள் நினைத்தால் எந்தவொரு சாதியையும் 'குற்றப்பரம்பரை' என்று அறிவிக்கலாம். தமிழ்நாட்டில் இச்சட்டத்தின்படி சுமார் 89 சாதிகள் குற்றப்பரம்பரையாக அறிவிக்கப்பட்டன. இந்தச் சாதிகளைச் சேர்ந்த 18 வயதை எட்டிய அனைவரும் தங்கள் பெயர், முகவரி மற்றும் கைரேகையைக் காவல் நிலையத்தில் பதிவுசெய்ய வேண்டும்.

இரவில் ஆண்கள் எல்லாம் போலீஸ் கண்காணிப்பில் ஊர் பொதுமந்தை அல்லது காவல் நிலையத்தில்தான் தூங்க வேண்டும். இந்த அடக்குமுறைச் சட்டத்தை எதிர்த்து, மதுரை மாவட்டம் உசிலம்பட்டி அருகே உள்ள பெருங்காமநல்லூரில் கடந்த 1920-ம் ஆண்டு ஏப்ரல் 3-ம் தேதி போராட்டம் வெடித்தது. அதை அடக்குவதற்காக ஆங்கிலேயர்கள் நடத்திய துப்பாக்கிச் சூட்டில், 16 பேர் வீரமரணம் அடைந்தனர். இதில் காயமடைந்து கிடந்தவர்களுக்குத் தண்ணீர் கொண்டு சென்ற பெண்ணும் உயிரிழந்ததாக கூறப்படுகிறது. இந்த நிலையில், பெருங்காமநல்லூர் தியாகிகளின் நினைவு தினத்தை ஒட்டி அதிமுக பொதுச்செயலாளர் எடப்பாடி பழனிசாமி பதிவு ஒன்றை வெளியிட்டுள்ளார்.

அதில் இபிஎல் கூறியிருப்பதாவது,

"ஆங்கிலேயர்களின் அடக்குமுறைச் சட்டமான குற்றப் பரம்பரை சட்டத்தை எதிர்த்து போராடியதற்காக, தென்னிந்தியாவின் ஜாலியன் வாலாபாக் என்று அழைக்கப்படும் பெருங்காமநல்லூர் துப்பாக்கி சூட்டில் ஆங்கிலேயர்களின் தோட்டாக்களுக்கு இரையாகி தங்கள் இன்னுயிரை துச்சமென எண்ணி வீரமரணம் அடைந்த பெருங்காமநல்லூர் தியாகிகளின் நினைவு நாள் இன்று. அதிகாரத்துவத்திற்கும், அடிமைத்தனத்திற்கும் எதிராய் கொடுங்கோன்மைச் சட்டத்தை எதிர்த்து போராடி, இனம் காத்த தியாகிகளின் வீரத்தையும் தியாகத்தையும் போற்றி வணங்குகிறேன்"

இவ்வாறு அதிமுக பொதுச்செயலாளர் எடப்பாடி பழனிசாமி தெரிவித்துள்ளார்.