ஹாங்காங் தீ விபத்து - உயிரிழப்பு எண்ணிக்கை 128 ஆக அதிகரிப்பு!

ஹாங்காங்கின் தை போ மாவட்டத்தில் உள்ள வாங் புக் கோர்ட் என்ற அடுக்குமாடி குடியிருப்பு அமைந்துள்ளது. புதுப்பிக்கும் பணி நடைபெற்று வந்த அடுக்கு மாடி குடியிருப்பு வளாகத்தில் நேற்று முன்தினம் பயங்கர தீ விபத்து ஏற்பட்டது.

இதில் 5 உயர்ந்த கட்டிடங்கள் முழுவதும் தீ பரவி எரிந்ததால் அந்த இடம் முழுவதும் கரும்புகை மண்டலம் சூழ்ந்தது. இதனை தொடர்ந்து சம்பவ இடத்துக்கு விரைந்த தீயணைப்பு துறையினர் கடும் போராட்டத்திற்கு பின் தீயை கட்டுக்குள் கொண்டு வந்தனர். இந்த அடுக்குமாடியில் 1 ஆயிரத்து 984 வீடுகள் உள்ள நிலையில் சுமார் 5 ஆயிரம் பேர் வசித்து வந்தனர்.

இந்த தீ விபத்தில் ஏற்கனவே 94 பேர் உயிரிழந்த நிலையில் உயிரிழப்பு எண்ணிக்கை மேலும் அதிகரித்துள்ளது. அதன்படி, ஹாங்காங் அடுக்குமாடி குடியிருப்பு தீ விபத்தில் உயிரிழப்பு எண்ணிக்கை 128 ஆக அதிகரித்துள்ளது. இந்த தீ விபத்தில் 79 பேர் காயமடைந்துள்ளனர். அதேவேளை, தீ விபத்தில் 200க்கும் மேற்பட்டோர் மாயமான நிலையில் அடுக்குமாடி குடியிருப்பில் தொடர்ந்து மீட்புப்பணிகள் நடைபெற்று வருகிறது.